Michaś Andrasiuk — adzin z samych viadomych biełarusaŭ Polščy, piśmieńnik, publicyst, žurnalist. 23 traŭnia jon pryviazie haradziencam svoj film «Za bočku miodu» i knihu «Bieły koń». Knihu možna budzie atrymać z podpisam aŭtara. Udzieł u imprezie voźmie bard Viktar Šałkievič.
Film Michasia Andasiuka «Za bočku miodu» — heta svojeasablivy trahifars. Padziei adbyvajucca paśla Druhoj suśvietnaj vajny… Novaja polska‑savieckaja miaža pradbačvajecca jakraz praź siaredzinu biełaruskaj vioski Apaka Vialikaja. Apačuki dumajuć, što zrabić u takoj situacyi. Dumali, i prydumali. Savieckim sałdatam, što vyznačali miažu naładzili zastolle, była samahonka — vioska i pa siońniašni dzień słavutaja hetym umielstvam — byŭ miod, i sała…i miaža pajšła ŭ dziesiaci krokach pobač ź vioskaj. I siońnia — hetaje kalenka terytoryi možna lohka zaŭvažyć, kali dobra ŭhledziecca ŭ dakładnuju kartu polska‑biełaruskaha pamiežža…
Piatnica, 18.30. Hrodna, Budzionnaha 48a — 44 (pamiaškańnie Tavarystva Biełaruskaj Škoły)
Uvachod volny.
