Učora niekatoryja ŚMI paviedamili, što asudžanyja papraŭčaj kałonii №45 (Kryčaŭ) abvieścili strajk praz toje, što za miesiac raboty pa padrychtoŭcy Dažynak u Mścisłaŭi im zapłacili tolki 150 rubloŭ.
Źniavolenyja davodziać da ładu vyhlad Mścisłava. Fota: Biełsat
Pavodle taho paviedamleńnia, 12 asudžanych strajkoŭcaŭ znachodziacca ŭ Kryčavie, a administracyja «chimii» zabrała ŭ ich srodki suviazi i pahražaje pieravodam u kałoniju.
Adnak u kamientarach pad hetaj navinoj u supołcy «Našaj Nivy» UKantakcie adpisalisia ludzi, jakija, maŭlaŭ, i ŭvachodziać u lik tych samych 12 čałaviek, što adbyvajuć pakarańnie i nie atrymali hodnaha zarobku.
U hutarcy z žurnalistam čałaviek, jaki nazvaŭsia źniavolenym, raspavioŭ svajo bačańnie i adznačyŭ niedakładnaści, jakija majuć miesca va ŭčorašniaj publikacyi.
«Nakont zarobku — tut poŭnaja praŭda. Kryčaŭskim padsobnikam dali pa 500 rubloŭ, a nam tut kamu 130, kamu 150. U kryčaŭskich [źniavolenych «chimii»] była samaja brudnaja rabota, my pa 11 hadzin u dzień batračyli — manalit, demantaž. Byli, viadoma, i lohkija dni, ale heta kamu asobna moža i pašancuje, u asnoŭnym ciažka pracavali. A tut tak… Ale nijakich buntaŭ ci arhanizavanych pratestaŭ nie było. Niekatoryja pracavali, a my chacieli pačuć adkaz ad administracyi, ale prarab adrazu niekudy źnik. Raźlikovyja nam prynieśli tolki pad abied. U vyniku majstar nam skazaŭ — idzicie ŭ aŭtobus, pajedziecie nazad u Kryčaŭ. Tam my pakazali raźlikoŭki načalstvu, dyk jany za hałavu schapilisia. I ja skažu, što administracyja na našym baku, chiba što nam skazali, što trochi my pałku pierahnuli, pierastaŭšy pracavać: maŭlaŭ, treba było darabić, a potym by prakuror užo raźbiraŭsia. Ciapier načalnik kaža, što heta tak nie pakinie. I nichto ŭ nas srodki suviazi nie adbiraŭ, ja ž z vami z telefona havaru i ŭ internet dostup jość», — skazaŭ nam źniavoleny.
Što ž da asoby, ad jakoj sychodziać čutki pra bunt, to naš surazmoŭca skazaŭ, što nibyta toj pjanym pasvaryŭsia z prarabam, za što patrapiŭ na ŠYZA, i ciapier na ŭsich zły.
Taksama mužčyna dadaŭ, što chacia damova ź imi była padpisanaja da vieraśnia, ad siońniašniaha dnia jany ŭžo nie pracujuć — pa ich nie pryjechaŭ aŭtobus. 30 lipienia stanie apošnim pracoŭnym dniom.
Administracyja «chimii» pakul što nie kamientuje padziejaŭ u Mścisłavie, tamu, jak tam było nasamreč, razabracca ciažka.