U chodzie raspačatych 24 žniŭnia ŭ sudzie Maskoŭskaha rajona Minska sprečak pa spravie byłoha hiendyrektara baskietbolnaha kłuba «Cmoki-Minsk» Kanstancina Šaraviery prakuror Raman Biziuk paprasiŭ pryhavaryć jaho da šaści hadoŭ kałonii ŭzmocnienaha režymu, a taksama kanfiskavać majomaść.
Šaraviera abvinavačvajecca ŭ tym, što braŭ hrošy kłuba, nieabhruntavana pavysiŭ svaju zarpłatu i arhanizavaŭ za košt kłuba bankiet u honar svajho jubileju.
Sudovy praces raspačaŭsia 14 śniežnia 2015 hoda. Paźniej pa chadajnictvie ciapierašniaha hiendyrektara kłuba Juryja Šakoły pasiadžeńni prachodzili ŭ zakrytym režymie až da siońniašniaha dnia, kali pačalisia sprečki.
Pa materyjałach kryminalnaj spravy, Šaraviera braŭ hrošy, jakija pryznačalisia supracoŭnikam. Aficyjnaja i realnaja zarpłata istotna adroźnivalisia. Jak tolki rabotnik atrymlivaŭ bankaŭskuju kartku, abvinavačany adbiraŭ jaje razam ź pin-kodam. U bankamacie jon zdymaŭ hrošy i pieradavaŭ padnačalenamu tolki častku naličanaj sumy, pra jakuju jany damaŭlalisia raniej ŭ vusnaj formie. Akramia taho, hulcy i treniery padpisvali kanfidencyjny dahavor da dahavora, adnak sumu kantrakta Šaraviera dapisvaŭ paźniej, kali podpis supracoŭnika ŭžo stajaŭ u dakumiencie. Forvard Alaksandr Łaškievič, naprykład, u siezonie 2012—2013 niedaatrymaŭ ad kłuba 290 młn. rubloŭ.
Častku zarobku pieradavali z ruk u ruki ŭ buchhałteryi. U hetym vypadku reštu, jak adznačana ŭ abvinavačvańni, Kanstancin Šaraviera zabiraŭ i vykarystaŭ pa svaim mierkavańni. Heta tyčyłasia zarpłaty jak biełaruskich hulcoŭ, tak i lehijanieraŭ «Cmokaŭ». Taksama śpisvalisia srodki, jakija pryznačalisia na kampiensacyju charčavańnia na zborach i treniroŭkach. U materyjałach spravy majucca źviestki bolš čym pra 60 epizodaŭ złačynnych dziejańniaŭ.
Adznačym, što ŭłaśnikam kłuba źjaŭlajecca Minharvykankam, finansavańnie idzie ź biudžetu.
Sam Šaraviera vinu nie pryznaŭ. U sudzie jon patłumačyŭ, što atrymanyja hrošy nie prysvojvaŭ, a vykarystaŭ na raźvićcio kłuba. Parušeńni buchhałtarskaha ŭliku patłumačyŭ niedaskanałaściu biełaruskaha zakanadaŭstva, asabliva pa pytańniach supracoŭnictva ź lehijanierami.
«Toje, što abvinavačany vykarystaŭ hrošy na patreby kłuba, znajšło paćviardžeńnie ŭ chodzie sudovaha śledstva, — zajaviŭ prakuror. — Adnak nie ŭ tym abjomie, heta značyć značnuju častku jon usio ž taki prysvoiŭ. Da taho ž vyšejpakazanyja vydatki nie byli naležnym čynam aformlenyja ŭ buchhałteryi. Za vydatkavanyja hrošy Šaraviera nie daŭ spravazdaču. Heta značyć, što kradziažom heta nie źjaŭlajecca, ale škoda kłubu naniesienaja».
Kanstancin Šaraviera byŭ zatrymany 14 krasavika 2014 hoda. Niezadoŭha da hetaha jon adznačyŭ 60-hodździe. Pa materyjałach kryminalnaj spravy, bankiet z nahody jubileju prachodziŭ na bazie kłuba pad vyhladam navučalnaha sieminara. Prakuror źviarnuŭ uvahu, što pakolki hości pili ałkahol, heta było zabaŭlalnaje, a nie adukacyjnaje mierapryjemstva. Na jubilei Šaraviery, darečy, prysutničaŭ pamočnik prezidenta pa pytańniach sportu Maksim Ryžankoŭ.
