Siońnia ŭ Sankt‑Pieciarburhu projdzie niefarmalny samit SND. U im źbirajecca ŭdzielničać i kiraŭnik biełaruskaj dziaržavy Alaksandar Łukašenka.
Paŭła Lohkaha — kiraŭnika presavaj słužby Alaksandra Łukašenki, ja spytaŭ, ci zaplanavanyja na samicie dvuchbakovyja sustrečy prezydenta Biełarusi:
«Ja nia viedaju, jak tam u Pucina, Nazarbajeva ci Juščanki. Pa našaj krainie ja pakul nijakaj infarmacyi nia dam. Pakul nia viedaju. Heta ž niefarmalny samit. I tut składana za niekalki dzion niešta planavać».
Spadar Lohki, zrazumieła, ahavaryŭsia. Rasieju ačolvaje ŭžo nie Ŭładzimier Pucin, a Dźmitry Miadźviedzieŭ. Maskoŭski palitolah Andrej Suzdalcaŭ, jaki raniej žyŭ i pracavaŭ u Biełarusi, miarkuje, što z novym prezydentam Rasiei ŭ Alaksandra Łukašenki budzie bolš prablemaŭ čym z papiarednim:
 Andrej Suzdalcaŭ |
«Alaksandra Ryhoraviča jak raz apošnim časam nia vielmi zadavalniajuć sustrečy niefarmalnyja, biez halštukaŭ. Jon apošnim časam staŭ prychilnikam usialakich praceduraŭ, cyrymonijaŭ. Čamu? A tamu što isnujuć pytańni, jakija jamu zadavali jašče letaś u śniežni. Jakija? Najpierš — prajaśnieńnie intehracyjnaha prajektu: što my budziem rabić ź intehracyjaj pamiž Rasiejaj i Biełaruśsiu? Što budziem rabić z rasiejskim rublom? Kali ŭ rešcie rešt budziem pravodzić referendum?
Na hetyja pytańni adkazać Maskvie jon nia moža. I tamu ŭźnikaje pytańnie pra vizyty. Jaki sens jechać Miadźviedzievu ŭ Miensk, kali adkazu ź Miensku niama. Značyć, tamu niama i sustrečy.»
Šef‑redaktar hazety «Narodnaja vola» Śviatłana Kalinkina ličyć: dačynieńni Maskvy z Alaksandram Łukašenkam zachavajucca jašče na peŭny čas:
 Śviatłana Kalinkina |
«Ja dumaju, što niejkija surjoznyja pytańni biełaruska‑rasiejskich dačynieńniaŭ razhladacca siońnia nia buduć. Ale dla Łukašenki heta jašče adzin šaniec zapeŭnić u niečym spadara Miadźviedzieva.
U bližejšyja hady, pakul nia budzie alternatyŭnaj hazavaj truby na Eŭropu, Rasieja budzie skroź palcy hladzieć na biełaruski režym. Pryčyna — treba zachoŭvać stały tranzyt. A jak tolki źjavicca novy šlach dastaŭki hazu ŭ Eŭropu, tady z Łukašenkam budzie inšaja razmova.
Ale sam toj fakt, što adrozna ad Jelcyna i ad Pucina, jakija paśla abrańnia na pasadu prezydenta, pryjaždžali spačatku ŭ Miensk i demanstravali sajuźnicki nastroj, Miadźviedzieŭ hetaha nie zrabiŭ — jak mnie padajecca, heta vielmi pakazalny fakt».
