«Raźličvajem, što biełarusy zamiežža buduć prasoŭvać nie tolki biełaruskuju kulturu, ale i spryjać pašyreńniu handlova-ekanamičnych suviaziaŭ», — zajaviŭ ministr zamiežnych spraŭ Uładzimir Makiej 5 vieraśnia ŭ Minsku na pasiadžeńni kansultatyŭnaj rady pa spravach biełarusaŭ zamiežža.
Fota Vadzima Zamiroŭskaha, Tut.by
U hetym kantekście Makiej adznačyŭ dapamohu, jakuju akazvajuć asobnyja vychadcy ź Biełarusi ŭ arhanizacyi pastavak pradukcyi ajčynnaj vytvorčaści za miažu. Pavodle jaho słoŭ, płanujecca pašyryć praktyku zaprašeńnia biełaruskich biźniesmienaŭ, jakija pražyvajuć za miažoj, dla ŭdziełu ŭ roznych forumach i kirmašach.
Makiej adznačyŭ, što hetaje pasiadžeńnie prachodzić u vielmi składany čas: «Vy bačycie, što adbyvajecca ŭ našym rehijonie, u Jeŭropie i śviecie. Šerah pahroz i vyklikaŭ isnujuć u tym liku dla Biełarusi. Heta — prablema teraryzmu, mihracyi, u tym liku nielehalnaj. Nastupstvy finansava-ekanamičnaha kryzisu niehatyŭna ŭpłyvajuć i na našu krainu».
Kiraŭnik MZS padkreśliŭ, što ŭrad sprabuje vypracavać «tyja kroki, jakija zmahli b nie dapuścić paharšeńnia finansava-ekanamičnaha stanovišča našaha naroda».
Makiej nahadaŭ, što mienš čym praz tydzień u krainie projduć parłamienckija vybary, jakija jon nazvaŭ «važnaj palityčnaj padziejaj». «Ja ŭpeŭnieny, što budzie sfarmavany novy parłamient, jaki zrobić usio dla taho, kab naša kraina i dalej raźvivałasia i kvitnieła», — zajaviŭ dypłamat.
Pavodle jaho słoŭ, ahulnaja dla ŭsich zadača — zrabić usio nieabchodnaje dla taho, kab Biełaruś zachavała svaju samastojnaść, suvierenitet i dziaržaŭnaść. «Los našaj krainy chvaluje ŭsich nas», — skazaŭ Makiej.
Jon adznačyŭ, što za minuły hod značna aktyvizavałasia ŭzajemadziejańnie arhanizacyj biełarusaŭ zamiežža z dypłamatyčnymi pradstaŭnictvami krainy, a dziakujučy pryniataj uradam padprahramie «Biełarusy ŭ śviecie» ŭpieršyniu jość mahčymaść akazać finansavuju padtrymku dla praviadzieńnia mierapryjemstvaŭ arhanizacyjami biełarusaŭ zamiežža. «Chaciełasia b atrymać bolš, ale my zychodzim z tych mahčymaściaŭ, jakija realna isnujuć, — skazaŭ Makiej. — Liču, što situacyja, u tym liku finansava-ekanamičnaja, budzie palapšacca i my taksama budziem mieć bolš mahčymaściaŭ dla taho, kab arhanizavać bolš aktyŭnaje supracoŭnictva ź biełarusami zamiežža».
U jakaści prykładu pracy arhanizacyi biełarusaŭ za miažoj čynoŭnik pryvioŭ adkryćcio kłasa biełaruskaj movy i litaratury ŭ škole amierykanskaha horada Sakramenta, jakoje adbyłosia 17 žniŭnia.
Pry hetym Makiej padkreśliŭ, što bolšaść arhanizacyj biełarusaŭ za miažoj majuć patrebu ŭ finansavaj padtrymcy. Zhodna z nacyjanalnym zakanadaŭstvam, adznačyŭ kiraŭnik MZS, Biełaruś nie moža napramuju finansavać zamiežnyja hramadskija arhanizacyi, ale hetaje pytańnie vyrašajecca praz sponsarskija prajekty.
Makiej padtrymaŭ prapanovu ab stvareńni ŭ Minsku Biełaruskaha doma, u jakim moh by raźmiaščacca muziej biełarusaŭ zamiežža, a taksama arhanizacyi, jakija ź imi supracoŭničajuć. «Ale heta jašče patrabuje prapracoŭki», — skazaŭ jon.
