U Hrodnie ŭžo vyprabavali novyja soniečnyja batarei, ustalavanyja 6 kastryčnika na prybudovie da luteranskaj kirchi. Z poŭnym zapuskam novaj sistemy haradzienskija luteranie zmohuć sami atrymlivać kala 50% nieabchodnaj elektraenierhii, pieradaje hrodna.life.
Ustanoŭkaj soniečnych batarej zajmałasia minskaja firma «Miedyum», jakaja ŭstaloŭvaje padobnyja kanstrukcyi pa ŭsioj Biełarusi. Majstar firmy Uładzimir kaža, što za takoj technałohijaj zdabyčy elektraenierhii budučynia.
«Čatyry paneli zmohuć davać kala 150 kVt⋅h za miesiac. Kali budzie sonca ŭvieś čas, to budzie adpaviedna bolš enierhii. Štomiesiac kircha z prybudovaj vypracoŭvała kala 260 kVt⋅h. Paśla poŭnaha zapusku sistemy lutaranie zmohuć atrymlivać kala 50% enierhii za košt sonca. Kali ŭ budučyni ŭstalujuć jašče stolki ž panelaŭ, to zmohuć vychodzić i na poŭnaje samazabieśpiačeńnie».
Pastar lutaranskaj kirchi Uładzimir Tatarnikaŭ adznačyŭ, što atrymańnie enierhii ad taho, što daje Boh, — heta toj šlach, jakoha jany i prytrymlivajucca.
«Asnoŭnaja častka pracy zroblenaja, sistema moža funkcyjanavać. Całkam my jaje zapuścim paśla ramontu ŭ pamiaškańni. Chutčej za ŭsio, heta adbudziecca da Novaha hoda.
Navat u drennaje nadvorje častka enierhii za košt ultrafijaletu budzie pastupać. Spadziajemsia, što sistema siabie akupić na praciahu 2—3 hadoŭ. U budučyni, pry dobrym raskładzie, pašyrym paneli i vyjdziem na samazabieśpiačeńnie elektraenierhijaj — dla nas heta važna. Adzin tolki arhan pahłynaje vielizarnuju kolkaść enierhii».
Pa stanie na kastryčnik 2016 hoda ŭ Biełarusi ŭžo bolš za 450 abjektaŭ, na jakich ŭstalavany soniečnyja batarei.
