Supracoŭniki adździeła pa baraćbie z ekanamičnymi złačynstvami Maskoŭskaha RUUS Minska sumiesna z kalehami z HUUS i UUS Homielskaha abłvykankama zatrymali hamialčanina, jaki nabyŭ u stalicy tavary za falšyvyja banknoty, jakija vyrabiŭ samastojna.
Jak paviedamili ŭ rajupraŭleńni milicyi, u orhany ŭnutranych spraŭ źviarnułasia žančyna i raspaviała, što małady čałaviek nabyŭ u jaje dźvie pary abutku, a raspłaciŭsia falšyvymi hrašyma. Praŭda, zasumniavałasia žančyna ŭ sapraŭdnaści kupiur tolki doma.
Na praciahu niekalkich hadzin paśla zvarotu ŭ milicyju chłopiec byŭ zatrymany. Im akazaŭsia 22-hadovy žychar Homiela. Małady čałaviek raspavioŭ, što na taki adčajny krok jon pajšoŭ dziela svajoj dziaŭčyny, jakoj paabiacaŭ kupić dźvie pary abutku. Tavar, jaki pryviezła znajomaja dziaŭčyny, jon atrymaŭ u Minsku i raspłaciŭsia za jaho falšyvymi hrašyma (7 kupiur vartaściu 50 denaminavanych rubloŭ).
Jak patłumačyŭ načalnik Maskoŭskaha (Minska) rajonnaha adździeła Dziaržaŭnaha kamiteta sudovych ekśpiertyz Dzianis Kuźmienka, u chodzie daśledavańnia ekśpiertami było vyjaŭlena, što vyjavy na siami hrašovych banknotach vartaściu 50 denaminavanych rubloŭ Nacyjanalnaha banka Biełarusi byli vykananyja sposabam kalarovaha kapiežna-strumienievaha druku.
Zatrymany pryznaŭsia, što nadrukavaŭ hrošy samastojna doma. Tam byli vyjaŭlenyja i kanfiskavanyja ŭ jakaści rečyŭnych dokazaŭ złačynnaj dziejnaści kapijavalnaja mašyna, arhtechnika, pryntar i padrychtavanyja dla vyrabu kupiur listy z nadrukavanymi falšyvymi 50-rublovymi kupiurami.
Maładomu čałavieku vystaŭlenaje abvinavačvańnie pa č. 1 art. 221 KK (vyrab, zachoŭvańnie abo zbyt padrobnych hrošaj ci kaštoŭnych papier) i da suda abranaja miera strymańnia ŭ vyhladzie padpiski ab niavyjeździe i naležnych pavodzinach. Sankcyja artykuła praduhledžvaje da siami hadoŭ pazbaŭleńnia voli z kanfiskacyjaj majomaści.
