Niahledziačy na niekatoraje zapavoleńnie padzieńnia ŭ pieršym paŭhodździ 2016 hoda, Biełaruś demanstruje najbolš nizkija tempy ekanamičnaha rostu siarod krain JEAES, havorycca ŭ ahladzie Jeŭrazijskaha banka raźvićcia.

Pry hetym u makraekanamičnym daśledavańni JEABR adznačajecca, što ŭ lipieni—žniŭni 2016 hoda, pavodle papiarednich acenak Biełstata, adznačajecca paskareńnie padzieńnia ekanomiki. Pa vynikach studzienia—žniŭnia VUP Biełarusi źniziŭsia na 3% u paraŭnańni z anałahičnym pieryjadam 2015 hoda. «Skaračeńnie vypusku praciahvałasia va ŭmovach słabaha ŭnutranaha i źniešniaha popytu na fonie kansiervatyŭnaj hrašova-kredytnaj i fiskalnaj palityki», — havorycca ŭ makraahladzie.

Ekanamisty JEABR vyłučyli asnoŭnyja faktary źnižeńnia ekanamičnaj aktyŭnaści ŭ Biełarusi. Tak, realnyja najaŭnyja dachody nasielnictva ŭ mai—žniŭni praciahnuli trend na źnižeńnie, skłaŭšy ŭ cełym za studzień—žnivień 93% ad uzroŭniu anałahičnaha pieryjadu 2015 hoda. Pry hetym na fonie padzieńnia realnych najaŭnych hrašovych dachodaŭ nasielnictva adznačajecca niekatoraje paskareńnie tempaŭ padzieńnia raschodaŭ na kančatkovaje spažyvańnie chatnich haspadarak u II kvartale (źnižeńnie ŭ paraŭnańni z II kvartałam 2015 hoda na 2,1%) i zapavoleńnie ściskańnia vałavoha nazapašvańnia asnoŭnaha kapitału (skaračeńnie ŭ paraŭnańni z II kvartałam 2015 hoda na 11,2%).

U makraahladzie taksama havorycca, što stanoŭčaja dynamika rostu pramysłovaj vytvorčaści, adznačanaja ŭ II kvartale 2016 hoda, viarnułasia ŭ śfieru admoŭnych značeńniaŭ u pačatku III kvartała, što ŭ bolšaj stupieni źviazana sa skaračeńniem abjomaŭ pierapracoŭki naftapraduktaŭ, abumoŭlenym źnižeńniem impartu syroj nafty z Rasii. U cełym za studzień—žnivień 2016 hoda padzieńnie pramysłovaj vytvorčaści skaraciłasia da 1,8% da adpaviednaha pieryjadu minułaha hoda (z padzieńnia na 2,5% u studzieni—krasaviku 2016 hoda).

Stanoŭčaja dynamika ŭ sielskaj haspadarcy, jakaja nazirałasia na praciahu studzienia—lipienia 2016 hoda, źmianiłasia ŭ žniŭni rezkim padzieńniem na 15,5% da žniŭnia 2015 hoda, što abumoŭlena jak vysokaj bazaj minułaha hoda (bolš poźni termin uborki zbožžavych u 2015 hodzie), tak i skaračeńniem uradžaju ŭ cełym u paraŭnańni z 2015 hodam. Padzieńnie ŭ sielskaj haspadarcy pa vynikach studzienia—žniŭnia 2016 hoda skłała 2,2% da adpaviednaha pieryjadu 2015 hoda paśla stanoŭčaha rostu na 4,2% za studzień—lipień 2016 hoda.

Admoŭnaja dynamika praciahvajecca ŭ budaŭnictvie i handli, dzie pa vynikach studzienia—žniŭnia 2016 hoda padzieńnie skłała -16,9% i -6,1% da takoha ž letašniaha pieryjadu.

Ekanamisty JEABR kanstatujuć, što pry isnujučych unutranych faktarach, jakija strymlivajuć adnaŭleńnie ekanamičnaha rostu, skaračeńnie pastavak syroj nafty z Rasii ŭ Biełaruś u pačatku III kvartała pryviało da źmieny prahnozu VUP na 2016 hod u bok źnižeńnia da minus 2,6% (papiaredni prahnoz — padzieńnie na 1,9%).

Pastupovaje adnaŭleńnie tempaŭ rostu čakajecca ŭžo ŭ 2017—2018 hadach na 0,6% i 0,9% adpaviedna. U toj ža čas, jak adznačajuć ekanamisty, vychad z recesii ŭskładnicca ŭ vypadku paharšeńnia źniešnich umoŭ abo realizacyi ryzyki finansavaj niestabilnaści na fonie rostu prablemnych aktyvaŭ bankaŭskaj sistemy.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?