Maks Stył
Žanr: fantastyka, bajavik, pryhody
Režysior: Ściuart Chiendler
U rolach: Bien Uinčał, Džoš Brenier, Maryja Biełła, Endzi Harsija, Ana Viłafejn, Majk Dojł
ZŠA, 92 chv.
Adznaka: 4
Padletak Maks Mak-Hrat viartajecca razam z maci ŭ horad, dzie naradziŭsia i dzie zahinuŭ baćka-navukoviec. Maks jaho nie pamiataje zusim. Niečakana chłopiec vyjaŭlaje, što jaho cieła moža hienieravać mahutnuju enierhiju.
Amal adrazu jaho znachodzić dziŭnaja istota, jakaja zdolnaja dać rady takoj enierhii, — techna-arhaničny inšapłanietnik Stył. Na žal, jon nie pamiataje, chto taki i adkul źjaviŭsia, ale moža trochi raskazać pra baćku Maksa, ź jakim siabravaŭ. Taksama Maks znajomicca z byłym kaleham baćki — Majłzam, jaki šmat hadoŭ naziraŭ za padletkam.
Maks vučycca kiravać svajoj siłaj i daviedvajecca pra vorahaŭ — ultralinkaŭ, jakija chočuć napaści na Ziamlu. Ale hałoŭny vorah akazvajecca zusim pobač.
Fantastyčny padletkavy ekšn zastavany na sieryi cacak pra supierhieroja Maksa Styła ad kampanii Mattel, jakaja i vystupiła adnym z pradziusaraŭ stužki.
Cacki stvoranyja pa matyvach sieryi multfilmaŭ, jakija vychodzili u pačatku 2000-ch. Treba adznačyć, što padabrany na hałoŭnuju rolu akcior z tvaru vielmi padobny da cacačnaha piersanaža:
Amierykaniec Bien Uinčał (Maks Mak-Hrat) źleva.
22-hadovy amierykanski akcior Bien Uinčał da taho byŭ zaniaty ŭ TV-sieryjałach. Jon nie adznačajecca asabliva bahataj mimikaj, nie pakazvaje hłybokaj dramy. Tut źlohku zakranutaja prablema ŭvachodu ŭ darosłaje žyćcio zvyčajnaha padletka, jaki, kaniešnie ž, choča być admietnym.
Zrešty, hetaja drama razyhranaja tak sabie, ale ad supierhierojskaha filma čakaješ chacia b niejkaj aryhinalnaj historyi. Siužet, u jaki i tak niaprosta pavieryć, razvalvajecca prosta na vačach, a sproby pažartavać z adnosinaŭ Maksa i Styła vyhladajuć biezdapamožnymi.
Druhasnym padajecca nie tolki sam siužet, ale i jaho vykanańnie.
Niekatoryja śpiecefiekty zroblenyja na amatarskim ŭzroŭni, toje tyčycca i dyzajnu niekatorych elemientaŭ. Da prykładu, inšapłanietnik Stył vyhladaje nadta padobnym da robata z hulni Portal 2 i navat pramaŭlaje padobnym čynam.
Źleva - inšapłanietnik Stył. Sprava - modul piersanalnaści Uitli z Portal 2, zaprahramavany jak mužčyna z zachodnim anhlijskim akcentam.
Film pryciahnuŭ uvahu amierykanskich krytykaŭ jak adzin z najhoršych kiniematahrafičnych tvoraŭ.
Stužka vyhladaje jak sproba pavysić navahodni prodaž cacak Mattel, jak hihancki rekłamny rolik pra supierhieroja. Navat dla zabaŭlalnaha kino z nulavoj prablematykaj heta sumny vypadak.
