Dniom 31 kastryčnika kala vioski Pakalubičy Homielskaha rajona Dziaržaŭtainśpiekcyja z prymianieńniem tabielnaj zbroi spyniała pjanaha kiroŭcu.
Kala vioski Pabieda Vietkaŭskaha rajona ekipaž DAI pačaŭ pieraśled aŭtamabila «Miersiedes», vykradzienaha sa štrafstajanki. Kiroŭca nie reahavaŭ na patrabavańni ab spynieńni. Pavialičvajučy chutkaść, jon staŭ uciakać ad supracoŭnikaŭ milicyi ŭ napramku Vietki, vilajučy z boku ŭ bok i nie dajučy siabie abahnać, a potym, raźviarnuŭšysia, praciahnuŭ ruch u napramku Homiela, paviedamiła načalnik adździaleńnia pa ahitacyi i prapahandzie UDAI UUS Homielskaha abłvykankama Volha Raźviakova.
Da pahoni dałučyŭsia jašče adzin aŭtamabil DAI, ale kiroŭca praciahvaŭ rabić sproby syści ad pieraśledu, pry hetym stvarajučy pahrozu žyćciu i zdaroŭju ludziej. Tamu milicyjaniery, paśla adpaviednych papiaredžańniaŭ, strelili i prabili zadniaje levaje koła «Miersiedesa». Ale i na spuščanym kole kiroŭca sprabavaŭ uciačy. Tolki paśla taho jak było prabita i pravaje zadniaje koła, aŭtamabil spyniŭsia. Kiroŭca vyskačyŭ z mašyny i kinuŭsia biehčy, ale jaho nahnali inśpiektary.
«U chodzie dalejšaha razboru było ŭstanoŭlena, što aŭtamabilem «Miersiedes» kiravaŭ niećviarozy 40-hadovy mužčyna. Ad prachodžańnia miedahladu jon admoviŭsia. Da apošniaj sustrečy z supracoŭnikami DAI 19 razoŭ pryciahvaŭsia da adkaznaści za parušeńni PDR, jašče ŭ 2013 hodzie jon byŭ pazbaŭleny prava kiravańnia terminam na try hady za jazdu ŭ niećviarozym vyhladzie. Charakterna, što za dva dni da pahoni hety ž kiroŭca byŭ zatrymany za kiravańnie ŭ niećviarozym stanie, na jaho było składziena dva administracyjnyja pratakoły. Na aŭtamabil byŭ nakładzieny aryšt, i jon byŭ dastaŭleny na štrafstajanku ŭ Homieli. Adnak mužčyna vyrašyŭ, što jaho aŭtamabilu tam nie miesca, i vykraŭ jaho sa stajanki», — raspaviała Raźviakova.
Ciapier u dačynieńni da kiroŭcy — žychara Homielskaha rajona — skłali šeść novych administracyjnych pratakołaŭ, pa jakich jamu pahražaje vialiki štraf.
