Pałata pradstaŭnikoŭ Parłamienta Nihieryi patrabuje skasavać «piramidu», arhanizavanuju rasijskim pradprymalnikam Siarhiejem Maŭrodzi, jakaja dziejničaje ŭ krainie, i aryštavać usich datyčnych da jaje asob, pieradaje telekanał currenttime.tv sa spasyłkaj na nihieryjski resurs pulse.ng.
Parłamient patrabuje «staranna» rasśledavać dziejnaść MMM «da taho, jak jano abrabuje nihieryjcaŭ i adbiare ŭ ich ź ciažkaściu zaroblenyja hrošy».
Anałahičnaje papiaredžańnie zrabiŭ kiraŭnik Departamienta abarony spažyŭcoŭ Centrabanka Nihieryi Zuleja Kasim, jon zaklikaŭ nie układvać hrošy ŭ MMM. «Hetyja cuda-banki nijakim čynam nie rehulujucca i źjaŭlajucca machlarskimi», — padkreśliŭ Zuleja Kasim. Jaho zajavu pakazvajuć pa miascovych telekanałach.
Finansavaja piramida MMM dziejničaje ŭ Nihieryi z 2016 hoda praz sacsietki, dzie ludzi dzielacca historyjami pośpiechu, a ŭkładčykam abiacajuć zarobak 1% za dzień abo 30% i bolš za miesiac.
Pa słovach ekśpierta, pryčyna papularnaści MMM ŭ krainie — «vysoki ŭzrovień biednaści i biespracoŭja» i toje, što Centrabank Nihieryi nijak nie rehuluje padobnyja abjadnańni.
****
Rasijanin Siarhiej Maŭrodzi — stvaralnik MMM, adnoj z bujniejšych u historyi Rasii i postsavieckich krain finansavych piramid. Pa roznych acenkach, u Rasii ad jaje dziejnaści paciarpieli 5—15 młn ŭkładčykaŭ. U 2003 hodzie Maŭrodzi byŭ asudžany ŭ Rasii za machlarstva ŭ bujnych pamierach na 4,5 hoda turmy.
Apošnim časam Maŭrodzi arhanizavaŭ niekalki prajektaŭ, anałahičnych MMM, u inšych krainach. U 2011 jon zapuściŭ MMM u Indyi i prykładna tady ž — u Kitai. Ź vieraśnia 2015 hoda jon aktyŭna pracuje ŭ Nihieryi i Zimbabve, Uhandzie i Maroka.
Niahledziačy na papiaredžańni ad miascovych kamunistyčnych partyj, schiema karystałasia ŭ afrykancaŭ vialikaj papularnaściu. U Zimbabve rachunki MMM byli zamarožanyja ŭładami ŭ vieraśni 2016 hoda.
Sam Maŭrodzi zapeŭnivaje, što ŭ jaho novuju sietku ŭvachodziać 137 młn čałaviek z 118 krain śvietu. Ale pravieryć hetuju ličbu niemahčyma: MMM nie rehistruje jurydyčnych asob, nie zdaje spravazdaču ab apieracyjach pierad finansavymi rehulatarami krain, u jakich pracuje.
