Biełaruś i Rasija nie izalavanyja ad suśvietnych kryzisaŭ, jość pytańni, jakija nieabchodna apieratyŭna vyrašać, zajaviŭ Alaksandr Łukašenka 22 listapada ŭ Kramli na pieramovach z Uładzimiram Pucinym. Kiraŭniki dziaržaŭ prybyli ŭ Kreml z chrama Chrysta Zbaviciela, dzie pavinšavali ź jubilejem patryjarcha Maskoŭskaha i ŭsiaje Rusi Kiryła, jakomu napiaredadni spoŭniłasia 70 hadoŭ.
Tut i nižej fota: president.gov.by
Jak paviedamlaje pres-słužba Kramla, na pieramovach prezidenty abmierkavali klučavyja pytańni dvuchbakovych adnosin, pierśpiektyvy prasoŭvańnia jeŭrazijskaj intehracyi, aktualnyja mižnarodnyja prablemy.
U pryvatnaści, Pucin zajaviŭ, što Rasija zastajecca handlova-ekanamičnym partnioram numar adzin dla Biełarusi, jakaja ŭvachodzić u piaciorku najbujniejšych handlova-ekanamičnych partnioraŭ Rasii.
«Praŭda, majučy na ŭvazie viadomyja ŭsim nam abstaviny, u minułym hodzie było nievialikaje źnižeńnie, u pieršym paŭhodździ hetaha hoda taksama jość nievialikaje, dzieści 8%. Ale zychodzim z taho, što heta ŭsio źjavy časovyja, a hałoŭnaje, što ŭ nas jość nie prosta vialikija prajekty. Hałoŭnaje — što stvorany miechanizm i ŭznaŭleńnia abjomu našych handlova-ekanamičnych suviaziaŭ, i ich dyviersifikacyi», — skazaŭ Pucin.
«My nie tolki ŭ stanie ŭsio heta adnavić, ale i, biezumoŭna, rušyć dalej», — upeŭnieny prezident Rasii.
Pavodle jaho słoŭ, uzajemnyja inviestycyi dźviuch krain praciahvajucca. «Praciahvajecca pašyreńnie kaapieracyi, u tym liku ŭ śfiery mašynabudavańnia, sielhasmašynabudavańnia. Usio heta pieradumovy dla taho, kab ruchacca dalej», — zajaviŭ Pucin.
«Ja vielmi rady mahčymaści ŭbačycca z vami jašče raz, na hety raz z takoj pryjemnaj nahody, jak jubilej našaha patryjarcha. Ale, jak zvyčajna byvaje, my lubuju mahčymaść vykarystoŭvajem dla dziełavych dyskusij, dla abmierkavańnia našych biahučych spraŭ i płanaŭ na najbližejšuju pierśpiektyvu», — adznačyŭ Pucin.
U svaju čarhu Łukašenka padziakavaŭ Pucinu za zaprašeńnie i «dobruju ideju», padadzienuju rasijskim prezidentam «prykładna dva tydni tamu, razam pryjechać i pavinšavać našaha patryjarcha ź jubilejem».
«U hety burny čas, kali na nas nakatvajuć to z adnaho boku, to ź inšaha roznaha rodu kryzisy, my nie izalavanyja ad hetaha. Jość pytańni, jakija my pavinny apieratyŭna, chutka vyrašać. Dumaju, my abhavorym hetyja pytańni, jakija čas ad času ŭźnikajuć, i, jak zaŭsiody, prymiem samaje dakładnaje rašeńnie», — skazaŭ Łukašenka.
Svaju sustreču z Pucinym Łukašenka anansavaŭ 17 listapada ŭ čas pres-kanfierencyi dla rasijskich žurnalistaŭ u Minsku. Pavodle słoŭ biełaruskaha kiraŭnika, padčas pieramoŭ jon raźličvaje «nadać novy impuls» dvuchbakovym adnosinam. Na dumku Łukašenki, u hetym hodzie ŭ adnosinach Biełarusi i Rasii było «bolš niehatyvu». «Tamu my damovilisia z prezidentam Rasii (napeŭna, 22-ha dzieści my sustreniemsia, na nastupnym tydni): siadziem udvoch i abmiarkujem niekatoryja pryncypovyja pytańni. Ja nie skažu «kanceptualnyja» — my ŭžo vyznačylisia pa ŭsich pytańniach. Treba prosta vykonvać našy damoŭlenaści. Pretenzii i da nas, i da Rasijskaj Fiederacyi, ale my voś sam-nasam siadziem dzieści, cichieńka abmiarkujem hetyja pytańni i damovimsia», — skazaŭ Łukašenka.
Raniej «prablemnyja aśpiekty ŭ biełaruska-rasijskim uzajemadziejańni» Łukašenka i Pucin abmierkavali ŭ telefonnaj razmovie 9 listapada.
Jak paviedamlałasia, Minsk i Maskva dahetul kančatkova nie ŭrehulavali pytańni koštu rasijskaha hazu i zahruzki syravinaj biełaruskich naftapierapracoŭčych zavodaŭ. Mierkavałasia, što hetyja pytańni buduć abmiarkoŭvacca padčas asabistaj sustrečy kiraŭnikoŭ dziaržaŭ u Maskvie.
