Paramonaŭ piša: «Russkaja istorija stała u nieho…» U tym i sprava, što ŭ Karamzina nie było RUSKAJ historyi — była RASIJSKAJA. I Hreč spačatku vydavaŭ svaje knihi pa RASIJSKAJ słaviesnaści. Jahonyja knihi pa RUSKAJ słaviesnaści źjaviacca ŭ caravańnie Mikałaja Pałkina — u druhoj pałavinie 1820-ch. Tady ž budzie ŭvaskrošana i raźvita stvoranaja ŭkraincam (a chutčej małarosam) Fieafanam Prakapovičam teoryja tryadzinaha ruskaha naroda. U rečyščy hetaj kancepcyi Maskoŭskaja dziaržava stanie Ruskaj, a Kijeŭskaja dziaržava — Staražytnaruskaj (zdajecca, heta taksama idzie ad Fieafana). Žaleznaj dohmaj paniaćci «Ruskaja dziaržava» i «Staražytnaruskaja dziaržava» stanuć z pryniaćciem pastanovy CK KPSS, Savieta Ministraŭ SSSR i Prezidyuma Viarchoŭnaha Savieta SSSR ab 300-hodździ ŭźjadnańnia Ukrainy z Rasijaj.
U paśmiarotnym (jak pomnicca, 4-m) vydańni knihi akademika Barysa Hrekava ŭsiudy słovy «Kijeŭskaja dziaržava» buduć apieratyŭna pamianianyja (ci nie Maŭrodzinym?) na «Staražytnaruskaja dziaržava». Samo saboj, žaleznaj dohmaj stanuć paniaćci «staražytnaruskaja mova» (choć Sraźnieŭski i mnohija inšyja ličać staražytnaruskaj movu dapiatroŭskaj epochi) i «staražytnaruski narod». Karamzin byŭ pieśniarom samadziaržaŭja i centralizacyi. U SSSR pieršy momant (pra nieabchodnaść dla Rasii samadziaržaŭja) aficyjna admaŭlaŭsia, a voś «źbirańnie ruskich ziamiel» Maskvoju i centralizacyja, likvidacyja aŭtanomii paasobnych ziemlaŭ padnosiłasia jak vyklučnaje dabro.
Piśmieńnik Karamzin ustareŭ (pravilna piša Paramonaŭ, što Haŭryła Dziaržavin bližejšy našamu sučaśniku), ale historyk Karamzin u Rasii ci nie «živieje vsiech živych».
