Kolkaść suiskalnikaŭ statusu biežanca ŭ Hiermanii źniziłasia ŭ minułym hodzie praktyčna ŭtraja, piša VVS. Jak paviedamiŭ ministr unutranych spraŭ krainy Tomas de Mieźjer, u 2016 hodzie pa hety status źviarnulisia 280 tysiač čałaviek suprać 890 tysiač hodam raniej.
De Mieźjer patłumačyŭ źnižeńnie prytoku biežancaŭ uhodaj pamiž ES i Turcyjaj, a taksama pierakryćciem papularnaha ŭ biežancaŭ šlachu da Hiermanii praz Bałkany: z-za mihracyjnaha kryzisu mnohija dziaržavy na paŭvostravie zakryli svaje miežy.
Ahienctva Asašyejted Pres dadaje, što mnohija ludzi, jakija prybyli ŭ krainu ŭ 2015 hodzie, padali zajavu na atrymańnie statusu biežanca tolki ŭ 2016 hodzie. Heta značyć, kolkaść ludziej, jakija realna zajechali ŭ Hiermaniju letaś, moža być jašče nižejšaj.
Taksama ŭžo stała viadoma, što 55 tysiač mihrantaŭ u 2016 hodzie pakinuli Hiermaniju i viarnulisia na radzimu. Pavodle dadzienych niamieckich ŚMI, u asnoŭnym pakinuli krainu vychadcy z Zachodnich Bałkan, u jakich nie było šancu atrymać status biežanca ŭ Hiermanii.
Zbolšaha rost kolkaści achvotnych pakinuć Hiermaniju źviazany z tym, što ŭrad u vypadku dobraachvotnaha adjezdu vypłačvaje siemjam mihrantaŭ kampiensacyi, uklučajučy transpartnyja vydatki.
U pačatku śniežnia ŭrad Hiermanii pradstaviŭ prahramu viartańnia mihrantaŭ na radzimu. Za try hady na dapamohu im ułady Hiermanii źbirajucca vydatkavać 150 młn jeŭra. Pry hetym ułady krainy paśla napłyvu mihrantaŭ zrabili bolš žorstkimi praviły atrymańnia statusu biežanca i kantrol na miežach.
