U bližejšaj piacihodcy ŭrad maje namier vyjści na poŭnaje pakryćcio nasielnictvam zatrat na akazańnie pasłuh ŽKH i paštovaj suviazi, istotna pavysić hetuju płanku dla transpartu. Pry hetym nahruzka na realny siektar ekanomiki pavinna simietryčna źnizicca. Heta vynikaje z kompleksu mier pa realizacyi Prahramy sacyjalna-ekanamičnaha raźvićcia Biełarusi na 2016-2020 hady, zaćvierdžanych pastanovaj Saŭmina № 18.
Pavyšeńnie taryfaŭ na žyllova-kamunalnyja pasłuhi («z ulikam źnižeńnia vydatkaŭ i pradastaŭleńnia hramadzianam bieznajaŭnych žyllovych subsidyj») płanujecca davieści da kanca 2017 hoda da 75% kampiensacyi vydatkaŭ na ich akazańnie nasielnictvu, da kanca 2018 hoda — da 100%.
Što datyčycca pavyšeńnia taryfaŭ na transpartnyja pasłuhi, to u 2018 hodzie płanujecca vyjści na pakazčyk «nie mienš za 70%», jaki źbirajucca ŭtrymlivać na dadzienym uzroŭni ŭ 2019—2020 hh.
Da 2020 hoda chočuć pavysić rehulavanyja taryfy na pasłuhi elektrasuviazi i paštovaj suviazi (z ulikam źnižeńnia vydatkaŭ) da 100% kampiensacyi vydatkaŭ na ich akazańnie nasielnictvam.
U dakumiencie taksama havorka i ab skaračeńni pierakryžavanaha subsidziravańnia z 2019 hoda. Heta aznačaje źnižeńnie cenaŭ i taryfaŭ dla realnaha siektara ekanomiki.
Pavyšeńnie taryfaŭ na pasłuhi ŽKH i transpartu źjaŭlajecca pradmietam pieramovaŭ uładaŭ Biełarusi ź Mižnarodnym valutnym fondam. Zamiežnyja kredytory patrabavali pravieści taryfnyja pieraŭtvareńni za 18 miesiacaŭ. Biełaruski ŭrad chacieŭ ich raściahnuć da 2020 hoda. Atrymlivajecca, što ŭłady Biełarusi ŭ nadziei atrymać kredyt na 3 młrd dalaraŭ pačuli patrabavańni MVF. Jak heta budzie realizavana na praktycy - pakaža čas.