Tavarystva «Zialonaja sietka» i hramadskaja kampanija «Haradski laśničy» prezientavali ŭ Minsku 27 studzienia prajekt «Čorna-zialonaja karta Minska».
Aktyvist kampanii Dźmitryj Hieryłovič paviedamiŭ, što prajekt ujaŭlaje saboj interaktyŭnuju kartu, na jakoj paznačanyja zialonyja zony — parki, skviery, hazony, a taksama čornyja i šeryja zony — pustki, zakinutyja terytoryi, pramysłovyja pradpryjemstvy, što nie pracujuć.
«Śvietła-zialonym koleram paznačanyja prosta zialonyja ŭčastki, ciomna-zialonym — zony, dla jakich užo praličanaja suma ekasistemnych pasłuh u hod; čornym koleram na šerym poli paznačanyja pradpryjemstvy, pra jakija jość ekanamičnaja infarmacyja: kolkaść rabotnikaŭ, prybytkovaść ci stratnaść», — rastłumačyŭ jon.
U vieraśni 2016 hoda kamanda pačała stvareńnie karty i na siońnia skončyła pracu nad pieršym, Leninskim, rajonam stalicy.
«Ideja ŭ tym, kab daviedacca, nakolki racyjanalna my vykarystoŭvajem haradskuju terytoryju, kali havorym ab prampradpryjemstvie abo parku. Kab paraŭnać hetyja dźvie roznyja terytoryi, my pieravodzim ekałahičnyja vyhady (šuma- i pyłaŭłoŭlivańnie, ačyščeńnie pavietra i h.d.) u ekanamičnyja, vykarystoŭvajučy mietad acenki ekasistemnych pasłuh pryrodnych terytoryj, raspracavany Nacyjanalnaj akademijaj navuk. Dla pradpryjemstvaŭ my paznačali infarmacyju ab prybytkovaści abo stratnaści za 2015 hod», — paviedamiŭ Hieryłovič.
Aktyvist patłumačyŭ, što karta daje mahčymaść abhruntavać i dakazać uładam i žycharam, što bolš vyhadna — zachavać niejkuju zialonuju zonu abo addać jaje pad zabudovu inviestaru.
«Na prykładzie karty možna bačyć, što ŭžo praličany zialony ŭčastak płoščaj 12 hiektaraŭ zachoŭvaje ŭ hod kala 12 tys. dołaraŭ u vyhladzie niavydatkavanych srodkaŭ na leki i balničnyja, zachavanuju pracazdolnaść nasielnictva i inšaje, a kambinat «Kamvol», jaki zajmaje 18 hiektaraŭ, za 2015 hod maje čystuju stratu amal 3 młn dołaraŭ», — skazaŭ Hieryłovič, padkreśliŭšy, što pry ekanamičnych raźlikach nieabchodna ŭličvać i toje, kolki pracoŭnych miescaŭ daje toje ci inšaje pradpryjemstva.
Jon adznačyŭ, što na siońniašnim etapie stvareńnia karty nie ŭličvajucca dvarovyja terytoryi i drobnyja zialonyja pasadki kala budynkaŭ.
U płanach kampanii — pradstavić poŭnuju čorna-zialonuju kartu Minska ŭ 2019 hodzie, u pierśpiektyvie — kartu Biełarusi. Dalej hetaja karta moža vykarystoŭvacca žycharami dla vyznačeńnia ekałahičnaści mikrarajonaŭ pry kupli žylla. U jakaści prykładu jon pryvioŭ anałahičnuju kartu Ńju-Jorka (ZŠA), na jakuju naniesienaje kožnaje dreva na kožnaj vulicy z fota i padrabiaznym jaho apisańniem, až da čakanaj praciahłaści žyćcia dreva i taho, jakuju ekałahičnuju i ekanamičnuju karyść jano prynosić horadu ŭ absalutnych ličbach.
«Biezumoŭna, nam jašče daloka da takoj karty, bo nad joj pracavała 2.200 vałancioraŭ, a ŭ našaj kamandzie ŭsiaho šeść čałaviek, — skazaŭ jon. — Ale kali ludzi nas pačujuć i dałučacca da inicyjatyvy, sprava pojdzie značna chutčej».
Hieryłovič dadaŭ, što sioleta płanujecca raspracavać veb-dadatak, z dapamohaj jakoha kožny achvotny zmoža nanieści na kartu drevy ŭ svaim dvary, rajonie.
