Dekretam ab papiaredžańni sacyjalnaha ŭtrymanstva aburyłasia nievialikaja častka nasielnictva, zajaviŭ Alaksandr Łukašenka 3 lutaha na sustrečy z pradstaŭnikami hramadskaści i ŚMI.
Pa słovach kiraŭnika dziaržavy, jon prasiŭ Marjanu Ščotkinu i Natallu Kačanavu, jakija na toj momant zajmali pasady ministra pracy i sacyjalnaj abarony i vice-premjera adpaviedna, acanić, jakaja častka nasielnictva suprać hetaha dekreta. «I mnie tady dałažyli: my praviali dbajnaje daśledavańnie, jakaja častka nasielnictva aburyłasia hetym dakumientam. Jak ja i čakaŭ, heta nievialikaja častka, niekalki tysiač čałaviek, ale vielmi aktyŭnyja», — adznačyŭ Łukašenka.
Na jaho dumku, ludzi adreahavali «vielmi vostra» na toje, što «ich abazvali darmajedami», tamu što heta saviecki termin, pad jakim «razumieli ludziej, jakija łajdaki i asacyjalny ład žyćcia viaduć». «I voś ludzi heta pieranieśli na siabie. Nie treba pieranosić, — padkreśliŭ Łukašenka. — Ja nie budu chavać, u mianie byŭ elemient matyvacyi, kali ja prymaŭ hetaje rašeńnie. Da hetaha času, asabliva ŭ sielskaj miascovaści, u małych haradach, dzie ŭsie adzin adnaho viedajuć, niekatoryja z ranicy da nočy pracujuć, i dzietki ŭ ich, atrymlivajuć niejkija tam 400-500 rubloŭ. I im niaprosta. A niekatoryja abiboki chodziać, jany ž bačać adzin adnaho, ni čorta nie robiać, a žyvuć niadrenna i nidzie nie pracujuć».
Łukašenka adznačyŭ, što ŭ Biełarusi nasielnictva nie płacić 100% za pasłuhi ŭ śfiery achovy zdaroŭja, jak u krainach z rynkavaj ekanomikaj. «Tak, kamu nie padabajecca naša miedycyna, drennaja jana, ale tym nie mienš my ŭvachodzim užo ŭ piaciorku lepšych. I heta nie naša acenka, — zaŭvažyŭ jon. — Kali pradstaŭniki Suśvietnaj arhanizacyi achovy zdaroŭja siudy pryjechali i my arhanizavali kanfierencyju, mianie zaprasili na jaje. I kali jany pačali havaryć, ja zrazumieŭ, što takoje ŭ śviecie miedycyna. Da 50 młn čałaviek u ZŠA nie majuć mahčymaści atrymać miedycynskuju dapamohu, a my lečym i bamža, i ałkaša, jaki sam sabie nahu złomić, a my jaho lečym. Nie bieź niedachopaŭ naša miedycyna, zhodny. Ale pytańnie nie ŭ hetym».
«Kolki my za heta zapłacili? Adukacyja, biaśpieka, abarona, na vulicach biaśpieka i inšaje, i inšaje. Voś hetyja lhoty dla dzietak. Heta vydatki. Čamu ja pavinien płacić padatak, a ty nie ŭdzielničaješ u finansavańni ŭsiaho hetaha, choć atrymlivaješ adpaviednyja pasłuhi? Treba było ich padšturchnuć», — skazaŭ kiraŭnik dziaržavy.
Adnym z vynikaŭ realizacyi dekreta Łukašenka nazvaŭ toje, što ludzi, jakija praciahły čas nie pracavali i nie byli zarehistravanyja ŭ jakaści biespracoŭnych, stali rehistravacca ŭ jakaści biespracoŭnych. «Skaraciłasia ciakučaść. Niekatoryja ŭ kanviercikach zarabotnuju płatu atrymlivali. Padatki z hetaha płaciać? Tut my padahnali i ahalili tyja pracesy, jakija my navat nie bačyli da pryniaćcia hetaha dakumienta, — skazaŭ prezident. — Kali kahości heta pakryŭdziła, to nie ja vinavaty, što abazvali darmajedami. Vy tut nie znojdziecie ŭ dekrecie prezidenta słova «darmajed». Čamu pieravažnaja — 95% — masa nasielnictva za heta pieražyvaje? Vy pracujecie, płacicie padatki, hety dakumient tyčycca nievialikaj častki nasielnictva, jakuju my padšturchoŭvajem dla taho, kab jany pracavali. Ale my ž nie prymušajem pracavać».
Łukašenka źviarnuŭ uvahu na toje, što ŭ dekret uniesieny źmianieńni, pavodle jakich ludzi, jakija trapili ŭ ciažkuju žyćciovuju situacyju, vyzvalajucca ad vypłaty hetaha zboru. «My doŭha dumali, što roznyja vypadki byvajuć, jak nie pakryŭdzić čałavieka. I tady my dapisali tudy adnu formułu, jakaja vyrašaje ŭsie prablemy — kali ty trapiŭ u niejkuju žyćciovuju ciažkuju situacyju, treba vyklučyć hetaha čałavieka, kab nie płaciŭ hetyja hrošy», — skazaŭ jon, dadaŭšy, što rašeńnie ŭ takich vypadkach prymajuć sielskija saviety ci haradskaja administracyja.
«Liču, što niama padstaŭ siońnia dalej raskručvać hetuju temu. Hety dekret pracuje hady try. Davajcie pažyviom. Kali my ŭžo z vami pryjdziem da adnoj niepachisnaj vysnovy, što heta anachranizm i jon nie patrebien, my jaho admienim. Nie śpiašajciesia. Moža, jon jašče šmat čaho karysnaha pryniasie ŭ naša žyćcio», — zajaviŭ Łukašenka.
Jon taksama paviedamiŭ, što za hod pa dekrecie «ab darmajedach» było sabrana 12,5 młn rubloŭ.
