Alaksandr spadziajecca adšukać u sudzie praŭdu, fota kp.by
14 lutaha ŭ sudzie Centralnaha rajona Homiela pačniecca pieršy ŭ historyi Biełarusi praces darmajeda suprać dziaržavy. Adstojvać svaje pravy budzie 53-hadovy Alaksandr Siamionaŭ, a dapamahać jamu budzie pravavy inśpiektar niezaležnaha prafsajuza REP Leanid Sudalenka. Užo bolš za miesiac jon akazvaje jurydyčnuju dapamohu i dapamahaje skłaści skarhi tym, chto atrymaŭ «listy ščaścia» z padatkovaj.
— Napisaŭ užo bolš za 170 skarhaŭ u padatkovyja inśpiekcyi. Adkazy atrymanyja pa ŭsich skarhach u rajonnyja padatkovyja inśpiekcyi i amal usie adnolkavyja: dekret ustupiŭ u siłu, heta zakon, tamu płacicie. Mnohija pahadzilisia pajści dalej i pisać skarhi ŭ abłasnyja padatkovyja inśpiekcyi. Było składziena ŭžo i dźvie zajavy ŭ sud.
U pieršym vypadku žančyna daviedałasia, što nieabchodna płacić dziaržpošlinu 23 rubli dla padačy zajavy ŭ sud, ale ŭ jaje niama hrošaj navat na chleb. A ŭ druhim vypadku skarhu padali, pieršaje pasiadžeńnie pryznačanaje na 14 lutaha, — raspavioŭ kp.by juryst.
— Heta hramadzianskaja sprava, skarha na dziejańnie słužbovych asob dziaržaŭnych orhanaŭ, jakija ŭščamlajuć pravy hramadzianina. Heta značyć, nakiravaŭšy paviedamleńnie, padatkovaja inśpiekcyja zrabiła dziejańnie, jakoje, na dumku zajaŭnika, uščamlaje jaho pravy, tamu jon prosić pryznać heta parušeńniem jahonych pravoŭ.
U sudzie majuć namier dakazać, što praca źjaŭlajecca pravam, a nie abaviazkam hramadzian:
— My budziem stavić pytańnie ab supiarečnaści dekreta prezidenta Kanstytucyi — u kožnaha sudździ jość takoje prava. A druhoje — budziem damahacca pryznańnia ŭdziełu Siamionava ŭ finansavańni dziaržaŭnych raschodaŭ i nieprymianieńnia da jaho dekreta. Ja prymaju u dzień pa 150 čałaviek, jakija prychodziać ź biržy pracy i kažuć, što na ŭliku staić 400 čałaviek, a vakansii ŭsiaho dźvie — ŭpakoŭščyk makułatury z zarobkam 230 rubloŭ i roznarabočym u morh biez ukazańnia zarobku.
Alaksandru Siamionavu 53 hady, jon maje 28 hadoŭ pracoŭnaha stažu i dźvie śpiecyjalnaści: inžyniernuju, a taksama «markietynh i mieniedžmient na rynku tavaraŭ i pasłuh». 12 hadoŭ prapracavaŭ u «Homielchlebpramie», u «Abłhandalsajuzie», potym u Rasii, a z 2013 hoda - aficyjna biespracoŭny.
- Uładkavacca niedzie było nierealna. Adsyłaŭ reziume, ale brali maładziejšych. U mianie jość učastak ziamli, tamu pracuju na ziamli i za heta ŭdajecca vyžyvać. U siamji pracujuć žonka i dačka. Kali pryjšoŭ list z padatkovaj, vyrašyŭ abaraniacca, bo heta niespraviadliva — patrabavać ź mianie padatak. Ja pracavać chaču, ale pracy niama.
Čamu pavinny žonka i dačka skidacca na padatak? Ja źviartaŭsia ŭ harvykankam, patłumačyŭ, što ŭ mianie ciažkaje stanovišča, ale pa telefonie mnie skazali sabrać daviedki, adznačyŭšy, što, chutčej za ŭsio, ad padatku mianie ŭsio roŭna nie vyzvalać.
Alaksandr kaža, što choča pasprabavać zmahacca, tamu idzie ŭ sud:
- Jak kazali ŭ maim lubimym filmie, siła - u praŭdzie. Ja spadziajusia znajści praŭdu. Pasprabuju dakazać, što dekret supiarečyć Kanstytucyi, i što ja pracuju na ziamli, vyroščvaju bulbu i ŭdzielničaju ŭ finansavańni dziaržraschodaŭ u tym, što płaču padatak na aŭto, bo jezdžu na daču na svajoj stareńkaj mašynie, apłačvaju mabilnuju suviaź, chadžu ŭ mahaziny, płaču padatak na ziamlu.
