Incydent adbyŭsia dniom 15 lutaha. Chutkuju vyklikali minaki, jakija zaŭvažyli čałavieka, jaki lažaŭ u hurbie, piša UUS Viciebskaha abłvykankama.
Akazałasia, što dvoje mužčyn paśla raśpićcia śpirtnoha «adpačyvali»: adzin u hurbie, druhi — niedaloka na łaŭcy. Da prybyćcia miedykaŭ jany ŭžo byli ŭ prytomnaści i ad prapanavanaj dapamohi admovilisia. Ale potym adzin ź ich pačaŭ pavodzić siabie ahresiŭna, prystavać da rabotnikaŭ chutkaj, sprabujučy vyśvietlić, chto ich vyklikaŭ. «Razborki» jon zładziŭ la aŭtamabila z boku kiroŭcy, pry hetym adłamaŭ vietravy abciakalnik.
Tady miedyki vyklikali milicyju. Debašyry ŭciakli ź miesca zdareńnia da prybyćcia patrula. U dadzieny momant adzin ź ich, 1968 hoda naradžeńnia, zatrymany i dastaŭleny ŭ śpiecyjalizavany izalatar. Składzieny administracyjny pratakoł za znachodžańnie ŭ hramadskim miescy ŭ stanie ałkaholnaha apjanieńnia.
