 |
Havoračy pra srodki biaśpieki, mechanizm jakich zakryty i nie prachodziŭ niezaležnych pravierak, ciažka być na 100% upeŭnienym u ich nadziejnaści, asabliva, kali viadziecca pra ataku z boku dziaržaŭnych słužbaŭ, jakija vałodajuć vialikimi mahčymaściami i resursami. Adnak, pavodle sukupnaści paviedamleńniaŭ, možna hruntoŭna padazravać, što niekatoryja słužby raźvitych krainaŭ užo majuć mahčymaść uzłomu skajp-kamunikacyjaŭ.
Naŭrad ci, hetyja ž mahčymaści ŭžo dastupnyja specsłužbam Łukašenki, ale, kali jany jość u čyichści rukach – rana ci pozna dojduć i da nas. Tamu, lepš zahadzia padrychtavacca i paźbiehnuć niepryjemnaściaŭ u budučyni.
24 lipienia «Heise Online» – resurs, specyjalizavany na navinach infarmacyjnych technalohijaŭ – paviedamiŭ, što na sustrečy pradstaŭnikoŭ aŭstryjskaha MUS z pravajderami internetu, z vusnaŭ palicejskich čynoŭnikaŭ, prahučała infarmacyja pra mahčymaść pierachopu infarmacyi, pierasyłanaj z dapamohaju Skype.
U suviazi z hetym, znoŭku abudzilisia staryja padazreńni, ab tym, što ŭ Skype isnuje backdoor (litaralna «čorny ŭvachod» – u dačynieńni da prahramanaha zabieśpiačeńnia, aznačaje nieafišavanuju mahčymaść złoŭžyvańnia biaz zhody karystalnika, zakładzienuju raspracoŭščykami). Isnujuć taksama i inšyja versii, naprykład, admysłova raspracavany «trajan». Adnak, toj fakt, što pres-słužba Skype naŭprost admoviłasia abvierhnuć čutki, schilaje dumki da horšaha varyjantu.
Treba zaznačyć, što pytańni da biaśpiečnaści Skype byli pastaŭlenyja daŭno: prahrama maje zakryty kod, zakryty pratakoł i nikoli nie prachodziła sapraŭdy niezaležnaha aŭdytu, tak što karystalnikam prapanujecca prosta pryniać da viery zapeŭnivańni kampanii. Aproč taho, Skype byŭ kupleny ŭ 2005 h. karparacyjaj eBay Inc., jakuju nieadnojčy abvinavačvali ŭ niedastatkova pavažnym staŭleńni da pryvatnaj infarmacyi karystalnikaŭ.
U suviazi z hetym jość rekamendacyi, niahledziačy na ŭsie zručnaści, jakija daje Skype, pierachodzić na vykarystańnie kamunikacyjnych prahramaŭ zasnavannych na pratakole jabber. Samy lohki sposab zavieści jabber-rachunak – heta zavieści skrynku na Gmail i skarystacca čatam, ubudavanym u paštovy interfejs (GoogleTalk ci GTalk – stvoranaja Google-am, kamunikacyjnaja systema, jakaja vykarystoŭvaje jabber-pratakoł). Pry hetym, abaviazkova, uvachodziačy u paštovuju skrynku, nabirać adras jak https://mail.google.com (zaŭvažcie: https, a nie http).
U vypadkach, kali vam nieabchodna budzie praciahvać vykarystańnie Skype – abaviazkova šyfrujcie dasyłanyja fajły z kanfidencyjnaj infarmacyjaj pry dapamozie PGP ci GPG.
