Užo ahučanyja filmy: «Łobstar» Jorhasa Łantymasa, «Čas» Endru Nikała, «Kapitan Fantastyk» Meta Rosa, «Prysud» Toni Hołduina, «Pustyja chaty» Kim Ki Duka, «Apošni samuraj» Edvarda Ćvika, «Viasna, leta, vosień, zima… i znoŭ viasna» Kim Ki Duka, «Biehčy pa lazie» Rydli Skota.
Usio trymajecca vyklučna na altruiźmie. Dla Adama i Tašy hałoŭnaje — raźvivacca samim i raźvivać Biełaruś.
Apošnija 10 hadoŭ Adam pracavaŭ u Navukova-daśledčym instytucie transpartu. Urešcie rešt nadakučyła, i jon vyrašyŭ zładzić pierazahruzku — skancentravaŭsia na ahučcy. Taša ciapier u dekretnym adpačynku, tamu pa mahčymaści dapamahaje mužu ŭ spravie.
«My chacieli razmaŭlać na rodnaj movie, ahučka — adzin sa sposabaŭ pahłybicca ŭ asiarodździe. Heta naš maleńki ŭniosak u spravu pašyreńnia biełaruskaści. Nam heta padabajecca, my adčuvajem unutranaje zadavalnieńnie, — tłumačyć Adam.
— Adnojčy ja znajšoŭ sajt z aŭdyjodarožkami da filmaŭ. Tam ich było kala dźviuch tysiač — na anhlijskaj, stolki ž — na ruskaj, adsotkaŭ na 30 mienš — na ŭkrainskaj. A dalej — na litoŭskaj, bałharskaj, francuzskaj, induskaj… Zdahadajciesia, na jakoj nie było nivodnaj?»
Adam i Taša zajmajucca tolki ahučkaj. Hołas, zapis, postpradakšn i reliz — heta ich rabota. Spačatku brali tyja teksty, što ŭžo isnujuć u siecivie, tamu vybar byŭ nie nadta bahaty. Niadaŭna pačali ščylna supracoŭničać ź pierakładčykam Cimafiejem Kalinoŭskim. Mienavita jon pierakłaŭ ulubiony film Adama i Tašy «Kapitan Fantastyk», jaki jany paśla ahučyli.
Adam zaŭvažaje, što ahučyć film nie tak i prosta. Treba i tekst vyrazna dy pravilna pračytać, i emocyi pieradać, i pačućci.
«Asobnyja skazy ŭ dyjałohach davodzicca adaptoŭvać pad maŭleńnie, bo časam vielizarnyja dziejeprymietnikavyja zvaroty ŭ aryhinale hučać jak niekalki słovaŭ», — raspaviadaje Adam.
Zvyčajna ahučka adnaho filma zajmaje kala dvuch tydniaŭ.
«Pakul zvarotnaja suviaź zusim nievialikaja, navat ludzi z našaj supołki nie nadta hladziać, — zaŭvažaje Adam. — Ale my razumiejem, što dla taho, kab nas hladzieli, patrebnaja doŭhaja płanamiernaja praca. Chaciełasia b raźvivać prajekt i padvyšać ułasny uzrovień.
U toj ža Rasii ci Ukrainie isnuje šmat studyj i reliz-supołak, jakija pierakładajuć i ahučvajuć filmy. Adny stvaralisia prafiesijnymi pierakładčykami, akciorami i hukainžynierami. Inšyja vyraśli z amatarskich inicyjatyŭ i ciapier nastupajuć prafiesijnym na piatki, kankurujuć ź imi i navat robiać ahučki pa zamovie dziaržtelekanałaŭ. Biełarusi ž u hetaj spravie treba prakładać svoj šlach».
Pahladzieć biełaruskamoŭnyja filmy, jakija ahučyli Taša i Adam, možna ŭ ich supołcy «UKantakcie». Siudy jany vykładajuć usie novyja raboty. Tut ža možna adšukać anonsy kinapakazaŭ u roznych haradach Biełarusi, dzie ŭdzielničajuć hetyja filmy.
