«KamAZ» prapracoŭvaje mahčymaść stvareńnia SP dla vytvorčaści ruchavikoŭ z kitajskaj Weichai Power u Jarasłaŭli. Pra heta piša «Kommiersant» sa spasyłkaj na pratakoł rasijska-kitajskaj mižuradkamisii pa inviestprajektach. Pikantnaść situacyi ŭ tym, što paŭhoda tamu Minsk chacieŭ naładzić zboračnuju vytvorčaść z Weichai Power u industryjalnym parku «Vialiki kamień», paviedamlaje TUT.BY.
Na «KamAZie» paćvierdzili, što prajekt u stadyi prapracoŭki. U kampanii nie raskryvajuć paramietry prajekta, ale raspaviali, što staviać ruchaviki Weichai Power na hruzaviki, jakija pracujuć na hazie (kala 1 tys. štuk u hod). Krynica rasijskaha vydańnia miarkuje, što «KamAZ» moža raźmiaścić vytvorčaść SP na mahutnaściach Tutajeŭskaha matornaha zavoda (u «KamAZa» 49,95% statutnaha kapitału).
Weichai Power — adna z najbujniejšych matorabudaŭničych kampanij KNR. Vosieńniu minułaha hoda kampanija sprabavała zajści na rynak JEAES, padpisaŭšy ź Biełaruśsiu miemarandum ab stvareńni SP pa vypusku dyzielnych ruchavikoŭ.
Budaŭnictva zavoda płanujecca ŭ Kitajska-biełaruskim industryjalnym parku «Vialiki kamień», paviedamiŭ u kastryčniku 2016 hoda ministr pramysłovaści Vital Voŭk. Jon kazaŭ, što MAZ užo vykarystoŭvaje ruchaviki hetaj kitajskaj kampanii. Minski matorny zavod maje prahramu raźvićcia da 2030 hoda, a taksama realizuje prahramu pa raźvićci dyzielebudavańnia, što patrabuje pryciahnieńnia partnioraŭ. «Pa hetaj prahramie nam nieabchodnyja partniory, tamu što ŭsiu liniejku ruchavikoŭ my nie robim, u nas niama dla hetaha pakul i mahutnaściaŭ, i niekatoraj kampietencyi», — tłumačyŭ Voŭk (cytata pa BiełTA). Tamu było pryniata rašeńnie ab pryciahnieńni ŭ jakaści partniora kitajskaj Weichai Power.
«Prajekt ruchajecca. Padabrany ziamielny ŭčastak, jość hienpłan budučaj vytvorčaści. Baki ciapier vyrašajuć arhpytańni», — zapeŭnili TUT.BY u «Vialikim kamieni».
