U kidańni mołata i šturchańni siarpa... prabačcie, jadra, dy jašče ŭ žančynaŭ, biełarusaŭ pieraŭzyści pakul ciažka. Druhuju załatuju (a ahułam — 13-ju) ŭznaharodu ŭ skarbonku našaj kamandy pryniesła ŭ sieradu Aksana Miańkova. Jana pakazała vynik 76.34 m.
Svoj najlepšy kidok Aksana pakazała ŭ piataj sprobie, ustalavaŭšy novy alimpijski rekord. Srebra dastałosia kubincy Ipsi Marena (75.20 m), bronza ŭ kitajanki Džan Vieńsiu (74.32 m). Jašče adna biełaruska Darja Pčelnik zastałasia ŭ kroku ad pjedestału, jana čaćviortaja.
Aksana była lideram sezonu, ale na jaje medal, tym bolš załaty, nichto nie raźličvaŭ. Jašče taja sensacyja! I jakaja pryjemnaja!
Staraja niepalitkarektnaja prykazka kazała «Vučy babu mołatam, budzie baba zołatam». A tut voś — baba sama mołatam zdabyvaje zołata.
Vinšujem pieramožcu!
U sieradu taksama biełaruski barec volnaha stylu Murad Hajdaraŭ staŭ bronzavym pryzioram Alimpijady-2008. U barukańni za bronzu ŭ vahavaj katehoryi 74 kh Hajdaraŭ pieramoh pradstaŭnika Rumynii Hiearhita Štefana.
Prapanujem vašaj uvazie videa pieramožnaha šturška Aksany Miańkovaj. Italjanski kamentar dy muzyka dadajuć jamu asablivaha dramatyčnaha kalarytu. Zaŭvaha: videa vystaŭlenaje italjanskimi zaŭziatarami, tamu spačatku idzie vystup kankurentki Aksany Klarysy Klareci, a sam pieramožny šturšok Aksany Miańkovaj možna pabačyć pačynajučy ad 2 chviliny 15 sekundy videa: