U Lvovie pravaachoŭniki praviali śpiecapieracyju pa vyzvaleńni zakładnikaŭ, jakich zachapiŭ pacyjent abłasnoj psichijatryčnaj balnicy.
facebook/igor.zinkevych
Jak paviedamili UNIAN u adździele kamunikacyj Hałoŭnaha ŭpraŭleńnia Nacyjanalnaj palicyi vobłaści, dla vyzvaleńnia ludziej pravaachoŭniki ŭziali šturmam zabłakavanaje pamiaškańnie. Złamyśnik zatrymany, 10 zakładnikaŭ i 5 palicejskich atrymali traŭmy roznaj stupieni ciažkaści.
«4 žniŭnia, kala 19.00, u Frankoŭski adździeł palicyi pastupiła paviedamleńnie ad rabotnika psichijatryčnaj balnicy, raźmieščanaj na vulicy Kulparkaŭskaj, ab tym, što ŭ adnym z adździaleńniaŭ miedycynskaj ustanovy pacyjent utrymlivaje zakładnikaŭ, pahražajučy ŭčynić nad imi fizičnuju raspravu», — havorycca ŭ paviedamleńni.
Pavodle danych palicyi, zatrymany — 30-hadovy lvavianin, jaki pa rašeńni suda z 2013 pa 2017 hod znachodziŭsia ŭ špitali na prymusovym lačeńni za zabojstva baćki — jon nanios zahinułamu 72 nažavyja ranieńni. Krychu bolš za miesiac tamu mužčynu adpuścili dadomu, adnak pa chadajnictvie svajakoŭ 4 žniŭnia ŭ 11.00 jon znoŭ byŭ źmieščany ŭ miedycynskuju ŭstanovu.
«Kala 19.00 mužčyna pačaŭ pavodzić siabie nieadekvatna, zabłakavaŭ dźviery ŭ adździaleńnie, dzie znachodzilisia 76 pacyjentaŭ, paškodziŭ majomaść i raźbiŭ vokny. Škłom z raźbitaha akna jon traŭmavaŭ dziesiać pacyjentaŭ, troje ź jakich znachodziacca ŭ ciažkim stanie. Paciarpiełyja pacyjenty — ludzi va ŭzroście ad 30 da 60 hadoŭ, u bolšaści ź ich dyjahnastavanyja rezanyja rany ŭ vobłaści šyi», — paviedamiŭ namieśnik načalnika Hałoŭnaha ŭpraŭleńnia Nacyjanalnaj palicyi ŭ Lvoŭskaj vobłaści Taras Sabaniuk.
Pa dadzienym fakcie raspačataja kryminalnaja sprava pa č. 2 art. 115 KK Ukrainy (Naŭmysnaje zabojstva).
Jak stała viadoma karespandentu UNIAN z krynic u abłasnoj psichijatryčnaj balnicy, zatrymany lvavianin — invalid druhoj hrupy z zachvorvańniem «paranaidalnaja šyzafrenija».
