Nadzvyčajnaja aktyŭnaść «niezaležnych» medyjnych arhanizacyj z vyraznaj prakramloŭskaj aryjentacyjaj vymahaje jasnaj reakcyi dy jasnaj ćviordaj pazicyi ŭsich siłaŭ, što vystupajuć suprać zachavańnia dy ŭzmacnieńnia ŭpłyvaŭ Kramla ŭ Biełarusi.
Prakramloŭskija psieŭda-ŚMI dy psieŭdahramadskija arhanizacyi ŭ Biełarusi imknucca na pieršym etapie dziejničać vielmi akuratna, demanstrujučy adkrytaść, kanstruktyŭnaść dy hatoŭnaść da supracoŭnictva. Maŭlaŭ, my staim na roznych pazicyjach, ale my za toje, kab i vašaja pazicyja taksama prahučała. My dadzim vam trybunu, prychodźcie, dyskutujcie, budziem razam šukać najlepšyja rašeńni. Hučyć pryhoža, sumlenna dy ščyra, chiba nie?
A ciapier davajcie ŭklučym łohiku. Spadziajusia, nikoha tut nie treba pierakonvać, što suprać biełaruskaha hramadstva (jak i suprać šmat jakich hramadstvaŭ, asabliva ŭ Centralnaj dy Uschodniaj Jeŭropie) Kreml viadzie infarmacyjnuju vajnu. I ŭsie hetyja prakramloŭskija arhanizacyi ŭ Biełarusi — heta pieradusim SRODKI INFARMACYJNAJ VAJNY. I tolki z hetaj pierśpiektyvy treba ich razhladać. Vidavočna, usie hetyja arhanizacyi stvarajucca nie dziela taho, kab pašyrać pluralizm u biełaruskim hramadstvie i tym bolej nie dziela taho, kab dać trybunu pradstaŭnikam nacyjanalna-kansiervatyŭnych siłaŭ abo libieralnych pohladaŭ u Biełarusi.
Jany stvarajucca vyklučna dziela prasoŭvańnia idejaŭ dy ŭstanovak kramloŭskaj prapahandy ŭ Biełarusi. I palityčnyja apanienty im patrebnyja jak pavietra. Ale tolki dziela taho, kab raskrucicca za ich košt dy stvaryć sabie reputacyju niezaležnych dy abjektyŭnych, kab paśla bolš efiektyŭna duryć hałovy biełarusam.
Tamu nie sprabujcie hulać u pluralizm dy kanstruktyŭnaść z tymi, chto viadzie suprać vas i suprać vašaha hramadstva infarmacyjnuju vajnu. Prosta kažycie im «nie». Zaŭsiody.
