Usie mabilnyja telefony kampanii Xiaomi pracujuć na apieracyjnaj sistemie Android, vykarystoŭvajučy firmovuju abałonku MIUI — mocna pierapracavanuju viersiju karystalnickaha asiarodździa, što najbolš adlustroŭvajecca na dyzajnie sistemy i niekatorych pryncypach kiravańnia pryładaj.
Standartnaja viersija AS Android 8 (sprava) i jaje pierapracavanaja viersija MIUI 9 (źleva)
Jak ni dziŭna, biełarusizacyjaj svaich smartfonaŭ zajmajecca nie sama kampanija, a supołka entuzijastaŭ ź Biełarusi.
Praź śpiecyjalny sajt jany słova za słovam pierakładajuć usio, što adnosicca da apieracyjnaje sistemy, dakładniej — da «prašyŭki» MIUI. My parazmaŭlali z adnym ź pierakładčykaŭ — minskim prahramistam Maksimam Jakuškinym, jaki raspavioŭ nam, u jakim tempie ruchajecca pierakład i kali zvyčajnyja karystalniki zmohuć ubačyć jaho ŭ svaich pryładach.
«Uvohule ŭ jakaści pierakładčykaŭ zarehistravalisia kala 15 čałaviek. Ale prablema ŭ tym, što ź ich aktyŭna pierakładajuć tolki 2-3 čałavieki, — kaža Maksim. — Naš prahres za tyja dva miesiacy, jak ja dałučyŭsia, padros na 22% i ciapier składaje kala 50%. Ale na čas kaladnych śviataŭ praca nad pierakładam krychu prypyniłasia, i mnie sumna, što praces ruchajecca tak pavolna».
Dałučeńnie Maksima da prajekta maje krychu ramantyčnuju historyju.
«My vyrašyli nabyć dla žonki novy telefon. Abrali Xiaomi, i vyjaviłasia, što ŭ im niama biełaruskaje movy. A papiaredni telefon jaje padtrymlivaŭ, — raspaviadaje chłopiec. — I voś ja pačaŭ cikavicca, ci možna niejak vypravić situacyju. Tak i pryjšoŭ da prajekta».
Dapamahčy ź pierakładam moža luby achvotny.
Dla hetaha spačatku treba zarehistravacca na sajcie, nacisnuŭšy knopku Sign up u vierchnim levym kucie ekrana, a potym dałučycca da supołki pierakładčykaŭ, nacisnuŭšy knopku Join, jakaja źjavicca na staroncy z raździełami pierakładu (tam ža adlustroŭvajecca i prahres kožnaha raździełu). Treba budzie pačakać, pakul zajaŭku ŭchvalić maderatar.
«Dla taho, kab dapamahčy prajektu, nie treba być prahramistam — treba tolki ŭmieć pierakładać z anhielskaj movy na biełaruskuju. A dla lepšaha razumieńnia sensu možna hlanuć pierakład na adnuju z tych movaŭ, dla jakich užo isnujuć pierakłady», — kaža surazmoŭca.
A chutkaść pierakładu i terminy jaho zakančeńnia zaležać ad aktyŭnaści ŭdzielnikaŭ. Zaraz najbolš aktyŭna pracujuć Maksim Jakuškin, Alaksandr Novikaŭ, Źmicier Horbač dy Dzianis Jackievič. Jak tolki prahres dasiahnie 100%, kampanija jak maha chutčej dadaść jaho ŭ čarhovaje abnaŭleńnie MIUI 9.
Bolš padrabiaznuju instrukcyju pa dałučeńni da prajekta možna znajści pa spasyłcy.