Dziaržpradpryjemstvy schapiła pryvatyzacyjnaja trasca.
«Da vybaru patencyjalnaha inviestara my stavimsia vielmi aściarožna», — zajaviła na pres‑kanfierencyi 28 kastryčnika ŭ Minsku dyrektar AAT «Centr mody» Luboŭ Manulik, adkazvajučy na pytańnie karespandenta BiełaPAN.
Jana paviedamiła, što 60% akcyj pradpryjemstva naležać členam kalektyvu, 40% — dziaržavie ŭ asobie kancerna «Biellehpram». «Da 2010 hoda płanujecca pradać dziaržaŭnuju dolu ŭ tavarystvie», — skazała Ł.Manulik.
Pavodle jaje słoŭ, da Centra mody «pačali prajaŭlać cikavaść patencyjalnyja inviestary z Rasii, Łatvii, Litvy». «Ale nam by chaciełasia znajści takich inviestaraŭ, jakich cikaviła b nie naša nieruchomaść u centry horada, a kirunak dziejnaści pradpryjemstva. My jaje chočam zachavać», — patłumačyła Ł.Manulik.
«Naprykład, našym inviestaram moh by stać niejki bank, jaki b inviestavaŭ u nas srodki i nie ŭmiešvaŭsia ŭ našu pracu», — ličyć dyrektar AAT.
Asnoŭnym kirunkam dziejnaści AAT «Centr mody» źjaŭlajecca raspracoŭka pramysłovych i prezientacyjnych kalekcyj modnaha adzieńnia pad zamovu, stvareńnie imidžu i firmiennaha stylu, raspracoŭka formiennaha i pradstaŭničaha adzieńnia dla artystaŭ, rabotnikaŭ dypkorpusu, telebačańnia, teatralnych dziejačaŭ, spartoŭcaŭ.
