U aŭtorak Ašmianskaja rehijanalnaja mytnia zatrymała kalininhradzkija fury z padakcyznym tavaram. Internet-hazeta gazeta.ru paviedamiła sa słovaŭ aŭtapieravozčykaŭ, što ich mašyny biełaruskija mytniki apiačatvajuć biez tłumačeńnia pryčynaŭ.
U toj ža viečar Uładzimier Załamaj, kiraŭnik kalininhradzkaha adździaleńnia pasolstva Biełarusi ŭ Rasiei, patłumačyŭ, što mytniki kiravalisia dekretam A.Łukašenki, padpisanym jašče ŭ śniežni 2005 hodu, zhodna ź jakim pieravozka padakcyznych tavaraŭ pavinna ździajśniacca pry ŭmovie spłaty mytaŭ, a taksama padlahaje abaviazkovamu supravadžeńniu Departamentam achovy MUS RB niezaležna ad padačy mytnym orhanam Biełarusi finansavych harantyjaŭ.
Pa słovach kalininhradzkich pradprymalnikaŭ, na rasiejska-biełaruskaj miažy nichto nie prapanoŭvaŭ im kanvajavać fury, a ŭžo na biełaruska-litoŭskaj miažy mašyny byli zatrymanyja za adsutnaść konvoju.
Ahienctva finansavych navinaŭ paviedamiła pra skapleńnie ŭ Ašmianach bolš čym dvuchsot furaŭ. Ale dziažurny mytni paviedamiŭ «Našaj Nivie», što zatrymanyja ŭsiaho dzieviać mašynaŭ. Kalininhradzkija fury majuć vypuścić za miažu, jak tolki ekspedytary pakažuć dakumenty ab mytnym afarmleńni hetych hruzaŭ u miescy ich atrymańnia.
Cikava, što za dzień da zatrymańnia, u paniadziełak, rasiejskaja hazeta «Kommiersant'» z spasyłkaj na svaje krynicy paviedamiła, što «Hazprom» razhladaje mahčymaści pavieličeńnia cany na haz da 200 dalaraŭ. Heta ŭ 4,5 raza bolej, čym ciapier. Raniej «Hazprom» vioŭ havorku pra pavieličeńnie ŭ 3 razy. Pavodle «Kommiersanta», prapanovy cany 200 dalaraŭ byli pieradadzienyja biełaruskamu boku. U «Hazpromie» hetuju infarmacyju nie kamentavali, a kiraŭnik «vykankamu sajuznaj dziaržavy» Pavał Baradzin vykazaŭ mierkavańnie, što kančatkovuju canu na haz vyznačać asabista prezydenty.
1 červienia ŭ Maskvu maje skiravacca na pieramovy ministar enerhietyki Alaksandar Aziarec.
Lider demakratyčnych siłaŭ Alaksandar Milinkievič zajaviŭ, što abarona niezaležnaści pavinna stać nacyjanalnym pryjarytetam na bližejšy čas. «Biełaruś čakajuć ciažkija časy. My papiaredžvali pra heta», — skazaŭ jon. U interviju telekanału «Eŭrańjus», što tranślavałasia ŭ sieradu, jon raskrytykavaŭ niehatoŭnaść uładaŭ da takoha pavarotu padziejaŭ.
Razam z tym jon vykazaŭ spadziavańnie, što Rasieja nie zacikaŭlenaja ŭ kryzisie ŭ Biełarusi. «Ja spadziajusia, što ŭsio-tki Biełaruś zmoža damovicca z Rasiejaj, i ceny buduć uvodzicca pastupova», — zajaviŭ jon.
Vice-premjer Andrej Kabiakoŭ paviedamiŭ pra toje, što ŭrad rychtuje biesprecedentny pakiet padatkovych ilhotaŭ dla małych i siarednich pradpryjemstvaŭ. Tak, miarkujecca vyzvalić małyja (da 15 zaniatych) pradpryjemstvy ad viadzieńnia buchhaltarskaha ŭliku i spłaty PDV, pryznačyŭšy dla ich adziny padatak u pamiery 10% ad vyručki. Suvymiernaja liberalizacyja čakaje siarednija (da 100 pracoŭnych) firmy. Hetkija miery mohuć być častkaj padrychtoŭki da kryzisu bujnoj pramysłovaści, niepaźbiežnaha ŭ vyniku padaražeńnia enerhanośbitaŭ.
Mikoła Buhaj
