Šasnaccacihadovaja biełaruska Taciana Kazyra 23 listapada viarnułasia ŭ Biełaruś z ZŠA.
«Ja viarnułasia, tamu što vielmi mocna sumavała pa domie, — skazała jana ŭ interviju. — Pieražyvała, jak tut maja babula. Zasumavała pa joj vielmi mocna».
Pavodle słoŭ dziaŭčyny, siamja Zapata, u jakoj jana žyła, nie pieraškadžała jaje viartańniu na radzimu. «Viadoma, jany pakryŭdzilisia, ale nie buduć ža jany mianie trymać nasilna», — skazała T.Kazyra.
Jana źbirajecca padtrymlivać suviaź z amerykanskaj siamjoj. «Budu zvanić, razmaŭlać ź imi, — zaznačyła T.Kazyra. — Ale ja ŭžo bolš tudy nie pajedu».
Jak paviedamlałasia raniej, dzieviać hadoŭ zapar T.Kazyra vyjaždžała ŭ ZŠA na azdaraŭleńnie pa čarnobylskaj prahramie. kožny raz jaje prymała siamja Zapata. 5 žniŭnia hetaha hoda Tania pavinna była vylecieć z San‑Francyska ŭ Minsk razam z hrupaj biełaruskich dziaciej, ale da pryznačanaha času nie prybyła ŭ aeraport. Paźniej stała viadoma, što dziaŭčyna padała ŭ imihracyjnuju słužbu dakumenty dla praciahu haściavoj vizy i zastajecca ŭ ZŠA, kab dačakacca rašeńnia ŭładaŭ. U ZŠA byŭ kamandziravany supracoŭnik MZS Biełarusi Pavieł Šydłoŭski, jaki niekalki razoŭ sustrakaŭsia z T.Kazyraj, ale taja adchiliła prapanovu viarnucca na radzimu.
20 listapada ŭ Ministerstva zamiežnych spraŭ Biełarusi pryjšła aficyjnaja zajava ad Nadziei Novik — babuli i apiekuna T.Kazyry. Pavodle źviestak pres‑słužby MZS, u joj havaryłasia, što dziaŭčyna pryniała «adnaznačnaje rašeńnie viarnucca na radzimu». N.Novik prasiła «pryniać nieabchodnyja zachady pa najchutčejšym viartańni» ŭnučki ŭ Biełaruś. Pry hetym jana «vykazvała zaniepakojenaść» tym, što siamja Zapata pieraškadžaje jaje viartańniu ŭ Biełaruś i zabaraniaje joj źviazvacca pa telefonie ź biełaruskim konsułam. Pradstaŭniku biełaruskaha MZS udałosia źviazacca pa telefonie z Taniaj, jakaja «paćvierdziła jamu svaju nastojlivuju prośbu dapamahčy joj jak maha chutčej viarnucca dadomu».
U pres‑relizie MZS paviedamlałasia, što biełaruski bok planuje aficyjna źviarnucca da kampetentnych orhanaŭ ZŠA z patrabavańniem pryniać nieabchodnyja zachady pa zabieśpiačeńni viartańnia niepaŭnaletniaj T.Kazyry ŭ Biełaruś.
Varta zaznačyć, što z‑za dadzienaha incydentu Biełaruś prypyniła prahramy azdaraŭleńnia biełaruskich dziaciej za miažoj. 13 kastryčnika Łukašenka padpisaŭ ukaz, zhodna ź jakim biełaruskija arhanizacyi zmohuć nakiroŭvać dziaciej na azdaraŭleńnie tolki ŭ tyja zamiežnyja dziaržavy, ź jakimi Biełaruś zaklučyła mižnarodnyja dahavory, što praduhledžvajuć dziaržaŭnyja harantyi biaśpiečnaha znachodžańnia biełaruskich dziaciej na azdaraŭleńni ŭ dadzienaj krainie i ich svoječasovaje viartańnie.
