Z 23 pa 27 sakavika va ŭstanovach achovy zdaroŭja Partyzanskaha rajona Minska projduć Dni piačonki. Jany arhanizavany Kamitetam pa achovie zdaroŭja Minharvykankama i administracyjaj centralnaj rajonnaj palikliniki №14 Minska.
Jak paviedamiŭ BiełaPAN namieśnik hałoŭnaha ŭrača 14‑j centralnaj rajonnaj palikliniki Alaksandr Vałasievič, akcyja zaklikana źnizić uzrovień zachvorvańnia piačonki i straŭnikava‑kišačnaha traktu ŭ žycharoŭ Partyzanskaha rajona. Na praciahu miesiaca da pačatku akcyi va ŭstanovach achovy zdaroŭja rajona budzie prachodzić razdača ankiet, raspracavanych hałoŭnym hastraenterołaham Ministerstva achovy zdaroŭja dla vyjaŭleńnia prablem piačonki. Usiaho siarod mužčyn pracazdolnaha ŭzrostu, jakija ŭvachodziać u hrupu ryzyki, budzie raspaŭsiudžana kala 5 tys. ankiet. Pa vynikach analizu adkazaŭ žycharoŭ Partyzanskaha rajona miedyki adbiaruć 50‑70 čałaviek, jakija majuć patrebu ŭ nieadkładnaj kansultacyi na respublikanskim uzroŭni ŭ suviazi z chvarobami piačonki. Takija kansultacyi buduć arhanizavanyja ŭ kancy sakavika. Aprača taho, padčas akcyi adbuducca čatyry lekcyi dla ŭračoŭ Partyzanskaha rajona pa prablemach piačonki.
Jak paviedamiŭ A.Vałasievič, najbolš raspaŭsiudžanaja pryčyna ŭźniknieńnia chvarob piačonki źviazana z užyvańniem ałkaholu. Partyzanski rajon stalicy, dzie žyvie najbolšaja kolkaść rabočych, źjaŭlajecca lideram pa raspaŭsiudžańni pjanstva i ałkahalizmu ŭ Minsku. Chvaroby piačonki tut sustrakajucca ŭ try razy čaściej čym u siarednim pa horadzie. Na praciahu apošnich dvuch hadoŭ chvaroby piačonki i straŭnikava‑kišačnaha traktu dzielać z ankałahičnymi zachvorvańniami 3‑4 miesca ŭ struktury pryčyn śmiarotnaści ludziej pracazdolnaha ŭzrostu. Bolšaja śmiarotnaść nazirajecca tolki ad źniešnich pryčyn (traŭmaŭ, atručeńniaŭ i h.d.) i zachvorvańniaŭ sardečna‑sasudzistaj sistemy. 80% usich chvarob piačonki i straŭnikava‑kišačnaha traktu, jakija pryvodziać da śmierci, — cyrozy piačonki.
Jak zaznačyŭ A.Vałasievič, razam z užyvańniem ałkaholu, jakoje za apošnija hady ŭ Partyzanskim rajonie krychu źniziłasia, pryčynami zachvorvańniaŭ piačonki mohuć być atłuścieńnie i bieskantrolny pryjom lekaŭ. Čakajecca, što padčas akcyi ŭdasca vyjavić i takich pacyjentaŭ.
