Kiraŭnik Biełarusi Alaksandr Łukašenka zajaviŭ, što rasijski bok «pravalvaje» damoŭlenaści ŭ ramkach sajuznaj dziaržavy Biełarusi i Rasiei.
Padčas pajezdki ŭ Mahiloŭskuju vobłaść jon zajaviŭ žurnalistam:
«Prezidenty prymajuć rašeńni, a ŭrad Rasii pravalvaje. Usio, pra što my damaŭlajemsia, padpisvajem na samym vysokim uzroŭni — usio błakujecca, nie vykonvajecca. Kali pačynaje błakavać Rasija i nie puskać nas na svoj rynak, dyk navošta nam hetaja intehracyja?
Ale nie ja vinavaty ŭ hetym. Nas abvinavačvajuć, što my biarom udzieł va «Ŭschodnim partniorstvie«, raźvivajem stasunki z Zachadam. A što nam rabić?» — skazaŭ Łukašenka.
Jon dadaŭ, što na bližejšaj sustrečy kiraŭnikoŭ uradaŭ Biełarusi i Rasii buduć razhledžanyja prablemy, jakija isnujuć u dvuchbakovych adnosinach. Taksama premjer‑ministr Rasii Ŭładzimir Pucin paprasiŭ sustrečy z Alaksandram Łukašenkam.
Pra novyja dačynieńni ź Litvoj
Alaksandr Łukašenka spadziajecca na palapšeńnie palityčnych adnosin ź Litvoj u čas praŭleńnia novaha prezidenta.
«Ja ź vialikim zadavalnieńniem adznačaju toj fakt, što ŭ Litvie vybrali kiraŭnikom dziaržavy maładoha prezidenta, a akramia taho — spartsmienku», — skazaŭ Alaksandr Łukašenka.«Liču, u nas jość šmat ahulnych pohladaŭ», — dadaŭ jon.
«Tamu ja spadziajusia na palapšeńnie našych adnosin, pierš za ŭsio ŭ palitycy, — adznačyŭ Prezident. — U ekanomicy ŭ nas kali i jość niejkija prablemy, to ich niamnoha». Kiraŭnik dziaržavy nahadaŭ, što Biełaruś vykarystoŭvaje Litvu jak tranzitnuju krainu.
«A što datyčyć palityki, to pierakanany, što z novym čałaviekam, novaj kamandaj, u jakoj šmat novych idej, my damovimsia», — skazaŭ na zakančeńnie biełaruski lider.
Pra Jeŭrabačańnie
Padrychtoŭkaj biełaruskaha ŭdzielnika «Jeŭrabačańnia» buduć zajmacca novyja ludzi. Ab hetym paviedamiŭ siońnia Alaksandr Łukašenka.
Pavodle słoŭ prezidenta, tydzień tamu pačali prapracoŭvacca novyja idei pa ŭdziełu Biełarusi ŭ «Jeŭrabačańni». «Usio budzie zamieniena: i kampanija, i ludzi», — skazaŭ kiraŭnik dziaržavy.
Alaksandr Łukašenka niezadavoleny situacyjaj z padrychtoŭkaj i ŭdziełam Biełarusi ŭ hetym piesiennym konkursie.
«Mnie heta paradkam užo nadakučyła: bałbatnia, bojka i inšaje. Staryzna, chłam, inakš nie nazavu. Sabralisia vakoł hetaha, pijarać, moža, jašče i hrošy jakija dzielać. Raźbiaromsia jašče», — skazaŭ kiraŭnik dziaržavy.
Havoračy ab vykanaŭcu ad Biełarusi na hetym konkursie, Alaksandr Łukašenka adznačyŭ: «Za miesiac‑paŭtara da pačatku konkursu mnie skardzilisia. Urešcie rešt, mnie heta ŭsio nadakučyła
i ja skazaŭ: nie pieraškadžajcie, my jaho vybrali, zamianić nie možam, kali partačyć mocna pačnie — davajcie nie budziem udzielničać u hetym hodzie naohuł. Vyrašyli ŭdzielničać. Voś vynik».
