Mižnarodny dziciačy konkurs pieśni «Jeŭrabačańnie‑2010» projdzie ŭ Minsku. Adpaviednaje aficyjnaje paviedamleńnie Jeŭrapiejskaha viaščalnaha sajuza (JEVS) atrymała 8 červienia Biełteleradyjokampanija.
Šou adbudziecca ŭ Minsku 20 listapada 2010 hoda. Damašnim viaščalnikam usich mierapryjemstvaŭ dziciačaha «Jeŭrabačańnia‑2010» vyznačana Biełteleradyjokampanija.
Na praviadzieńnie konkursu pieršapačatkova pretendavali mnohija krainy — ŭdzielnicy JEVS. Paśla pieršych słuchańniaŭ naziralnaha savieta viaščalnaha sajuza ŭ lutym 2009 hoda ŭ finale zastalisia try krainy — Biełaruś, Rasija i Malta.
5 červienia ŭ Kijevie adbyłosia pasiadžeńnie naziralnaha savieta JEVS, na jakim krainy‑finalistki pakazali svaje prezientacyi. U vyniku rašeńnie było pryniata na karyść Biełarusi. Miescam praviadzieńnia vyznačany spartyŭny kompleks «Minsk‑arena».
Siarod pieravah biełaruskaj zajaŭki‑prezientacyi pierad kankurentami z Rasii i Malty žury adznačyła najbolšuju detalizacyju ŭsich momantaŭ znachodžańnia zamiežnych delehacyj u Biełarusi, paviedamlaje pres‑słužba Biełteleradyjokampanii.
Tak, užo vyznačany prahrama dla adpačynku junych vykanaŭcaŭ, unikalny dyzajn sceny i vialikaja ŭmiaščalnaść areny (kala 15 tysiač hledačoŭ), a taksama słohan konkursu: Feel the magic («Adčuj čaraŭnictva»).
Płanujecca, što baniery z vyjavami udzielnikaŭ dziciačaha «Jeŭrabačańnia‑2010» buduć rasklejenyja na centralnych vulicach haradoŭ Biełarusi, a ich roliki buduć tranślavacca na videaekranach Biełteleradyjokampanii ŭ Minsku.
U najbližejšy čas budzie taksama nazvana imia artysta, jaki praviadzie majstar‑kłas dla ŭdzielnikaŭ piesiennaha konkursu. Siarod kandydatur razhladajecca Dženifier Łopiez, Džaścin Tymbierlejk i inšyja zorki suśvietnaj pop‑sceny, havorycca ŭ pres‑relizie kampanii.
Vykanaŭčy dyrektar konkursaŭ pieśni «Jeŭrabačańnie» Svante Staksieliuc daručyŭ Biełteleradyjokampanii sfarmavać kamandu dla padrychtoŭki konkursu i abrać vykanaŭčaha pradziusiera.
Dla pracy ŭ Minsk buduć zaprošanyja vopytnyja kampanii pa zdymcy, ustanoŭcy śviatła, techničnym abstalavańni, jakija ŭžo byli zadziejničanyja ŭ darosłych i dziciačych konkursach «Jeŭrabačańnia».
U Biełteleradyjokampaniju ŭžo pastupili zajaŭki ad patencyjalnych sponsaraŭ, udzieł jakich dazvolić pryciahnuć rekordnuju dla dziciačaha šou kolkaść krain‑udzielnic (da 20—25).
