28‑hadovy biełaruski paŭabaronca Alaksandr Hleb zadavoleny viartańniem u niamiecki «Štuthart».
«Dobra apynucca tut iznoŭ, tamu što heta moj dom, — zajaviŭ futbalist na pres‑kanfierencyi ŭ štutharckim hateli «Le Mierydźjon», paviedamlaje sajt kamandy. — Štuthart i kłub — heta maja radzima. Tut u mianie šmat siabroŭ, i ja chaču ŭ hetaj vydatnaj atmaśfiery čahości dabicca. U «Štutharcie» pačałasia maja karjera, i hety pierachod vyklikaje šmat nastalhičnych pačućciaŭ».
«Ja chaču zavajoŭvać tytuły i spadziajusia, što heta mahu zrabić razam sa «Štuthartam», — skazaŭ hulec.
Spartyŭny dyrektar kłuba Chorst Chielt zajaviŭ, što zajmieć Hleba było niaprosta. «Ja rad, što tranśfier atrymaŭsia i my zabrali Hleba dadomu», — zajaviŭ pradstaŭnik «Štutharta», jaki hulaŭ z Hlebam u pieršaj pałovie 2000‑ch hadoŭ. Pavodle słoŭ Chielta, pieramovy ab pierachodzie biełarusa pačalisia try miesiacy tamu.
«Aleks dapamoža nam dasiahnuć pastaŭlenych metaŭ, — pierakanany hałoŭny trenier «Štutharta» Markus Babiel. — Jon dobra ŭpisvajecca ŭ našu sistemu. Na jaho mohuć raŭniacca maładyja hulcy».
U novym siezonie Hleb budzie hulać u «Štutharcie» na pravach arendy.
30 lipienia niamiecki kłub padpisaŭ kantrakty z hulcom i ispanskaj «Barsiełonaj», jakoj naležać pravy na biełaruskaha lehijaniera. U minułym hodzie Hleb pierajšoŭ u «Barsiełonu» z anhlijskaha «Arsienała», adnak nie zmoh zamacavacca ŭ asnoŭnym składzie katałoncaŭ. Za «Štuthart» Hleb vystupaŭ u 2000—2005 hadach (137 matčaŭ, 13 hałoŭ). U apošnim čempijanacie Hiermanii kamanda zaniała treciaje miesca.
Sa Štutharta Hleb adpraviŭsia ŭ Barsiełonu, kab uładzić «niekatoryja farmalnaści».