Na Biełaruskim vakzale rasijskaj stalicy znajšli typovy nabor terarysta: tratył, hranatu, patrony, dymavyja šaški i elektradetanatary.
Torbu z samym sapraŭdnym naboram terarysta u Maskvu pryvioz ciahnikom № 40 nieviadomy mužčyna z Połacku. Jon paprasiŭ susiedku pa kupe pasačyć za jaho rečami i syšoŭ. Pračakaŭšy nieznajomca, žančyna adniesła torbu ŭ milicyju. Pres-słužba Maskoŭskaha UUS na čyhunačnym transparcie daje inšuju viersiju incydentu: žančynu zaŭvažyŭ patrul milicyi, jaki prapanavaŭ prademanstravać źmieściva sumki. Na pytańnie pra prynaležnaść zbroi žančyna raspaviała pra nieviadomaha maładoha čałavieka.
Usiaho ŭ sumcy lažała 5 tratyłavych šašak ahulnaj vahoj bolš za 1,5 kh, 18 patronaŭ da pistaleta Makarava, 34 patrony da vintoŭki Mosina, 11 patronaŭ da palaŭničaha ružža, vohniepravodnyja šnury, detanatary, hranata, dymavyja šaški i pirapatrony.
Milicyjanty skłali apisańnie haspadara sumki. Praz bazu Rasijskaj čyhunki pa numary miesca, vahona i ciahnika stali viadomyja jahonyja imia i proźvišča (ich nie razhałošvajuć). Śledčyja pakul nie viedajuć, čamu mužčyna źbieh, miarkujecca, što niešta jaho mahło napałochać. Viadziecca pošuk vierahodnaha haspadara tratyłu.