Žurnalist Hleb Łabadzienka vystupiŭ z zaklikam dapamahčy Valancinie Uładzimiraŭnie Bykavaj ‑‑ siastry Narodnaha piśmieńnika Biełarusi Vasila Bykava.
Hleb Łabadzienka paviedamiŭ Radyjo Svaboda, što padčas naviedvańnia Vušaččyny razam ź siabram i paplečnikam Vasila Bykava, paetam Ryhoram Baradulinym, jany naviedali Valancinu Ŭładzimiraŭnu. Žančyna raspaviała, što straciła zrok na adnym voku, ale praciahvaje čytać, u tym liku niezaležnuju presu. A taksama paškadavała, što nia moža pačastavać haściej pirahami, bo sapsavałasia duchoŭka.
Pavodle spadara Łabadzienki, hazavaja plita hetak znošanaja, što, zdajecca, moža vybuchnuć u kožnuju chvilinu. Tamu pa pryjeździe ŭ Miensk, na svaim internet‑błohu jon vystaviŭ zaklik sabrać hrošy na nabyćcio i ŭstalavańnie plity ŭ domie Valanciny Ŭładzimiraŭny Bykavaj.
Jak paviedamiŭ spadar Łabadzienka, supracoŭniki słužby hazu z Vušačaŭ abiacajuć u hetaj spravie dapamahčy.
Hleb Łabadzienka taksama paviedamiŭ, što pieršyja vodhuki na jahony zaklik źjavilisia litaralna praz paŭhadziny paśla vystaŭleńnia jaho ŭ internecie. Adnak srodkaŭ pakul nie dastatkova i žurnalist zaklikaje adhuknucca inšych nieraŭnadušnych ludziej.
0
0
0
0
0
0
