23 vieraśnia ŭ Minsku ź lekcyjami vystupiŭ rasijski bahasłoŭ Andrej Kurajeŭ. Dyjakan pahadziŭsia adkazać na pytańni «NN».
«NN»: Vy naviedali Minsk napiaredadni pryjezdu ŭ Biełaruś patryjarcha Kiryła. Što čakać ad jaho vizitu?
Andrej Kurajeŭ: Patryjarch pieršy hod pryśviačaje znajomstvu z cerkvami. Jon adkłaŭ niejkija ŭnutrypatryjarchalnyja spravy, kab spačatku ahledziecca na miescy. Pahladzieć na ludziej, śviataroŭ, jepiskapaŭ, kab paśla z novym vopytam spaznańnia Carkvy vyrašać, u jaki bok i što treba mianiać, kali patrebna ŭvohule.
«NN»: Ci mahčyma, na vašuju dumku, stvareńnie Biełaruskaj aŭtakiefalnaj pravasłaŭnaj carkvy?
AK: Ščyra kažučy, mnie navat niecikava abmiarkoŭvać takija fantastyčnyja prajekty. Bo subjektam historyi Biełarusi źjaŭlajecca biełaruski narod. I pytańnie ŭ tym, ci jość u narodzie takoje žadańnie, praha adłučycca ad maskoŭskaha patryjarcha i radavać siabie stvareńniem svajoj aŭtakiefalnaj carkvy. Ja pakul takich nastrojaŭ nie bačyŭ ni siarod biełaruskaha duchavienstva, ni siarod carkoŭnaha narodu. Tamu liču, što hetaja tema štučnaja.
«NN»: Kaścioł, jaki vy paprakajecie ŭ palityzavanaści i śvieckaści, viadzie słužbu ŭ našaj krainie pa-biełarusku. A pravasłaŭnaja carkva vykarystoŭvaje rasijskuju movu. Takaja palityka Maskoŭskaha patryjarchatu?
AK: Sprava ŭ tym, što ŭ katalikoŭ paŭstaje vybar pamiž polskaj movaj i biełaruskaj. Naturalna, što prychadžanie vybirajuć apošniuju. A ŭ pravasłaŭnych chramach vybar idzie pamiž biełaruskaj i carkoŭnasłavianskaj. Ale sama parafija i duchavienstva robiać hety vybar. Biełaruskaja carkva nie suprać słužby na rodnaj movie. Pytańnie ŭ tym, ci jość tut kansalidavanaje žadańnie prychadžan u hetym. My padobnuju situacyju nazirajem va Ukrainie. Tam jość aficyjnaje rašeńnie ŭkrainskaha Sinodu: kožny prychod sam vybiraje movu nabaženstva. I my bačym, što vielmi mała prychodaŭ słužyć pa-ŭkrainsku.
***
Dyjakan Andrej Kurajeŭ — prafiesar Maskoŭskaj duchoŭnaj akademii, bahasłoŭ i publicyst. Maje ampłua adnaho z samych prahresiŭnych śviataroŭ Rasijskaj pravasłaŭnaj carkvy. U svajoj knizie «Dysput z ateistam» jon dyskutuje z byłym namieśnikam kiraŭnika Administracyi prezidenta Biełarusi pa ideałohii Anatolem Rubinavym nakont jaho publikacyi ŭ «Sovietskoj Biełoruśsii». Dyjakana Kurajeva možna ŭbačyć u kampanii maładych ludziej na rok-kancertach, na jakija jon zaklikaje chadzić zamiest prahladu sieryjałaŭ. U internecie viadzie błoh.
