5 kastryčnika, padčas pres-kanfierencyi, pryśviečanaj Dniu rabotnika kultury, ministr kultury akreśliŭ pryjarytety svajoj dziejnaści.
Siarod ich byli nazvanyja: dastupnaść kultury, jak unutranaja, tak i źniešniaja; kultura jak imidž krainy; padtrymka maładych talentaŭ; zachavańnie histaryčnaj spadčyny.
Pavał Łatuška zaznačyŭ taksama, što «u apošni čas pavialičyłasia finansavaja padtrymka ustanoŭ kultury ŭ Biełarusi». Razam z tym, spadar ministr prapanavaŭ biznesu aktyŭniej padtrymlivać kulturnyja prahramy i mierapryjemstvy, u jakaści prykładaŭ nazvaŭšy stvareńnie sistemy pradusarstva ŭ krainie.
Šmat uvahi Łatuška nadaŭ mižnarodnamu supracoŭnictvu ŭ śfiery kultury, u tym liku i ŭ miežach «Uschodniaha partniorstva».«Nas abjadnoŭvaje ź Litvoj i Polščaj adzinaja kulturnaja spadčyna» – zazanačyŭ spadar ministr. Supracoŭnictva z hetymi krainami ŭ halinie restaŭracyi pomnikaŭ architektury było nazvanaje pryjarytetnym. Na hetyja mety ŭ 2010 h. płanujecca vydzielić 50 młrd rubloŭ.
Asobna spadar Łatuška zhadaŭ pra supracoŭnictva ź biełaruskaj dyjasparaj. «Važna, što adnaŭlajecca dyjałoh. My budziem aktyvizavać jaho. Heta padychod kiraŭnictva našaj dziaržavy», – adznačyŭ ministr i zapeŭniŭ, što Biełaruś budzie spryjać adkryćciu biełaruskich kulturnych centraŭ za miažoj. Najpierš u Litvie, Rasii, Ukrainie.
Zaviaršajučy pres-kanfierencyju,
ministr adznačyŭ, što płanuje pravieści rearhanizacyju Minsterstva kultury:«Z metaj aktyvizavać pracu ŭstanovy. Jaje uzajemadziejańnie z rehijonami».
Raźvitvajučysia z žurnalistami, spadar ministr paraiŭ kožny svoj dzień pačynać ź biełaruskaha słova: «Važna źmianić staŭleńnie hramadstva da biełaruskaj kultury».
