MVF stanoŭča aceńvaje chod realizacyi ŭ Biełarusi ekanamičnaj prahramy, u asnovie jakoj lažyć pahadnieńnie ab kredycie stend‑baj.
Pra heta havorycca ŭ paviedamleńni pres‑słužby Mižnarodnaha valutnaha fondu (MVF), apublikavanym pa vynikach pracy ŭ Biełarusi z 10 pa 19 listapada misii MVF dla ažyćciaŭleńnia treciaha ahladu prahramy stend‑baj.
U pryvatnaści, zaznačajecca,
što vykanany ŭsie kryteryi realizacyi prahramy i strukturnyja kantrolnyja pakazčyki, ustanoŭlenyja na kaniec vieraśnia.
«Pamiž misijaj supracoŭnikaŭ MVF i ŭładami Biełarusi dasiahnuta damoŭlenaść, jakaja padlahaje zaćviardžeńniu Vykanaŭčaj radaj dyrektaraŭ MVF, ab zaviaršeńni treciaha ahladu realizacyi pahadnieńnia ab kredycie stend‑baj. Pytańnie ab trecim ahladzie budzie razhladacca Vykanaŭčaj radaj dyrektaraŭ MVF u kancy śniežnia. Paśla zaviaršeńnia ahladu budzie mahčymym vydzialeńnie sumy ŭ pamiery 437,93 miljona SDR (kala 700 miljonaŭ dalaraŭ ZŠA)», — cytuje pres‑słužba kiraŭnika misii ekśpiertaŭ Krysa Džarvisa.
Pavodle słoŭ Džarvisa, dasiahnutaja ŭ dačynieńni da makraekanamičnych pakazčykaŭ na 2010 hod damoŭlenaść budzie sadziejničać realizacyi metaŭ prahramy. «Aściarožnaja padatkova‑biudžetnaja i hrašova‑kredytnaja palityka dazvolać skaracić deficyt rachunku najaŭnych apieracyj i panizić uzrovień inflacyi da adnaznačnych vieličyniaŭ. Hrašova‑kredytnaja palityka budzie pa‑raniejšamu skiravana na padtrymańnie davieru da režymu abmiennaha kursu», — padkreśliŭ jon.
Džarvis zaznačyŭ, što racyjanalnaja palityka zarabotnaj płaty budzie sadziejničać pavyšeńniu kankurentazdolnaści Biełarusi i ŭmacavańniu pierśpiektyŭ ekanamičnaha rostu pa miery adnaŭleńnia rostu suśvietnaj ekanomiki.
«Sacyjalnaja palityka nacelena na zabieśpiačeńnie adekvatnaj sistemy sacyjalnaj padtrymki najbolš uraźlivych słajoŭ nasielnictva», — skazaŭ jon.
Padčas svajoj pracy ŭ Minsku misija MVF taksama abmierkavała ź biełaruskimi ŭładami pytańni ŭmacavańnia finansavaj sistemy i niezaležnaści Nacyjanalnaha banka Biełarusi. Kansultacyi pa pytańni ab kirunkach i paśladoŭnaści strukturnych reform mohuć stać asnovaj dla nastupnaj prahramy paśla zakančeńnia terminu dziejańnia hetaj prahramy ŭ krasaviku 2010 hoda, zaznačajecca ŭ paviedamleńni.
Nahadajem, Biełaruś źviarnułasia pa atrymańnie kredytu da MVF u kastryčniku 2008 hoda «ŭ metach pavieličeńnia dziaržaŭnych zołatavalutnych reziervaŭ i stvareńnia «paduški biaśpieki», nieabchodnaj dla stabilnaj pracy ekanomiki va ŭmovach suśvietnaha finansavaha kryzisu».
U studzieni 2009 hoda kiraŭnictva MVF uchvaliła vydzialeńnie Biełarusi kredytu stend‑baj u abjomie kala 2,46 młrd. dalaraŭ pad prahramu ekanamičnych reform, raźličanuju na 15 miesiacaŭ (da krasavika 2010 hoda). Pieršy tranš kredytu ŭ 788 młn. dalaraŭ ZŠA pa staŭcy LIBOR plus 0,75% hadavych pastupiŭ u Biełaruś 14 studzienia, astatnija srodki pieraličvajucca z ulikam štokvartalnych spravazdač biełaruskaha ŭrada.
29 červienia rada dyrektaraŭ MVF zaćvierdziła vydzialeńnie čarhovaha tranšu kredytu ŭ pamiery kala 680 młn. dalaraŭ ZŠA i pavialičyŭ u cełym abjom finansavaj padtrymki na 1 młrd. da 3,52 młrd. dalaraŭ.
Z ulikam vydzielenaha 21 kastryčnika treciaha tranšu ŭ pamiery kala 700 młn. dalaraŭ ahulnaja suma pradastaŭlenych Biełarusi da hetaha času srodkaŭ pa prahramie stend‑baj składaje kala 2,23 młrd. dalaraŭ ZŠA.
