28 śniežnia ŭ hrodzienskim harsaviecie adbyłosia vielmi redkaje mierapryjemstva – abmierkavańnie losu budynka, jaki raźmieščany na vulicy Sacyjalistyčnaj 44. Upieršyniu za apošnija 15 hadoŭ Kamisija pa kultury pavinna była vyśvietlić — nadajecca budynak pad restaŭracyju, albo varta jaho źnieści i zbudavać na tym ža miescy novy, padobny da aryhinalnaha. Na abmierkavańnie byli vyniesieny ažno čatyry prajekty rekanstrukcyi.
Situacyja cikavaja tym, što budynak na Sacyjalistyčnaj znachodzicca ŭ vielmi dobrym stanie. Heta adna ź pieršych pabudoŭ, u jakoj prymianiaŭsia žalezabieton. Hrodzienskija krajaznaŭcy śviedčać, što ŭ budynku tolki niaznačna praciakaje dach, a sam jon nie patrabuje vialikaha ramontu. Unikalny dekor, jakim azdobleny ścieny pabudovy, nie pieražyvie nijakaj «restaŭracyi» – jaho paprostu budzie niemahčyma adnavić ŭ tym samym vyhladzie. Jak raspavioŭ «NN» hrodzienski krajaznaŭca Ihar Łapiecha, hety budynak unikalny.
«Takich u Biełarusi tolki kala dziesiaci. My vystupajem za poŭnaje zachavańnie budynka. Budziem nastojvać na tym, što firma «Zov» nie moža restaŭravać jaho praź niekampietentnaść. Budynkam pavinny zajmacca daśviedčanyja zamiežnyja restaŭratary, albo chacia b sa stalicy. My budziem praciahvać pisać zvaroty ŭ roznyja instancyi i ŚMI. Baimsia, što zamiest aryhinalnaha budynka moža źjavicca čarhovy mulaž. A heta niesučasnaja praktyka. Takoje dazvalałasia ŭ XIX st., ale zaraz jana nieprymalnaja».
U pracy Kamisii, akramia hrodzienskich deputataŭ, uziali ŭdzieł mer Barys Kaziałkoŭ, pradstaŭniki firmy «Zov»(jakaja zajmajecca restaŭracyjaj) i Biełaruskaha narodnaha banka (ułaśnik budynka), śpiecyjalist pa achovie pomnikaŭ architektury harvykankama V.Macko, pradstaŭniki hramadskaści. U adpaviednaści ź biełaruskim zakanadaŭstvam, prapanavanyja restaŭracyjnyja prajekty moža razhladać tolki Navukova-mietadyčnaja rada pry Minkulcie. Što i pryznała Kamisija pa kultury hrodzienskaha harsavieta.
Jak raspavioŭ «NN» jaho kiraŭnik Piotr Vaładźko, «Byŭ list z banka. Prasili vyrašyć pytańnie ab restaŭracyi. Kamisija sabrałasia, adnak takija pytańni moža vyrašyć tolki Minkult. My i skiravali ich tudy. Naša zadača, kab zachoŭvaŭsia zakon. I kab chutčej budynak adnavili. Jaho varta zachavać i nie ličyć pry hetym vydatki».
Niezrazumieła, čamu dla pieradačy spravy Minkultu spatrebiłasia sklikać kamisiju. Hrodzienskaja internet-supolnaść pierakananaja, što spravu z restaŭracyjaj źbiralisia vyrašyć vuzkim kołam, biez zachavańnia śpiecyjalnych pracedur. I tolki šyroki rozhałas, jaki jana atrymała, dazvoliŭ vynieści abmierkavańnie na bolš vysoki ŭzrovień.
Zastajecca spadziavacca, što los budynka pa vulicy Sacyjalistyčnaj nie paŭtoryć losu inšych hrodzienskich pabudoŭ, jakija nazaŭsiody źnikli z tvaru horada. Zaraz nieviadoma, kali adbudziecca pasiedžańnie Navukova-mietadyčnaj rady i jakoje rašeńnie jana prymie. Naturalna, što zakazčyku vyhadniej zbudavać novy, bolšy pa pamierach i tańniejšy abjekt. Ź inšaha boku, budynak z hrodzienskaj vulicy Sacyjalistyčnaj vielmi dobra nadajecca diał sapraŭdnaj restaŭracyi i moža stać vydatnym jaje prykładam.
