Prezident Litvy Dala Hrybaŭskajte prapanuje jak maha chutčej zakončyć praces lustracyi, zrabiŭšy dastupnymi ŭsie archiŭnyja materyjały, źviazanyja ź dziejnaściu KDB.Ab hetym prezident zajaviła ŭ sieradu 24 lutaha na sustrečy z členami parłamienckaha Kamiteta pa nacyjanalnaj biaśpiecy i abaronie.
«Heta adziny zrazumieły, chutki i jasny šlach zakryćcia temy lustracyi, jakaja ciahniecca ŭžo dva dziesiatki hadoŭ» -- pracytavaŭ słovy prezidenta jaje pres-sakratar Linas Balsis.
Pa słovach Balsisa, litoŭskim hramadzianam ŭžo davali mahčymaść pryznacca ŭ supracoŭnictvie sa śpiecsłužbami. «Ab dziejnaści hetych ludziej viadoma, im harantavali abaronu. Adnak praces dahetul niezavieršany: Kamisija pa lustracyi pracuje, jość spravy, ale vialikaja ich častka ŭ sudach zakančvajecca ničym, pakolki sudy nie mohuć pryniać rašeńnie pa pryčynie niedachopu dakumientaŭ. Ź lustracyjaj treba jak maha chutčej pakončyć, apublikavać ŭsie archiŭnyja materyjały, źviazanyja z tym, jak KDB i inšyja śpiecsłužby ŭciahvali žycharoŭ Litvy ŭ svaju dziejnaść» -- pracytavaŭ Balsis słovy Hrybaŭskajte.
Na dumku litoŭskaha prezidenta, razam z dakumientami treba pradstavić kvalifikavanaje, prafiesijnaje tłumačeńnie, kab było praściej zrazumieć, što značyć toj ci inšy dakumient i jak jon moh paŭpłyvać na los čałavieka. Ci moh čałaviek być zavierbavany abo stać ahientam.
Na siońniašni dzień ŭ supracoŭnictvie z KDB u Litvie pryznalisia kala 1500 čałaviek. Kala 5000 tečak z dakumientami vyvieźli ŭ Maskvu ŭ pieršyja hady niezaležnaści. Jašče kala 105 000 tečak ahientaŭ KDB źniščyŭ u 1989-1990 hh.
