Jak paviedamlałasia raniej, 12 sakavika ŭ 14.30 na pamiežnym pierachodzie «Kamienny łoh» była zatrymanaja žurnalista haziety «Narodnaja vola» Maryna Koktyš.
Jana hnała praź miažu nabyty ŭ Vilni aŭtamabil. Biełaruskija pamiežniki zajavili, što jaje aŭto zajaŭlenaje ŭ mižnarodny vyšuk. Žurnalista na znak pratestu suprać dziejańniaŭ mytnikaŭ abviaściła haładoŭku. Jana kala sutak praviała na miažy ŭ čakańni dakumientaŭ ź Vilni, kab paćvierdzić zakonnaść nabyćcia aŭto.
Maryna Koktyš, kaža, što chvalavałasia, kali jechała za miažu, bo jašče dobra pamiataje, jak u mai minułaha hodu jaje faktyčna pierad samym adlotam u Strasburh źniali z samalota i adviali na asabisty nadhlad. Ale takoha pavarotu padziejaŭ usio ž nie čakała.
«Ja nabyła aŭto praź Sieciva. Heta «Tajota» RAV‑4 2001 hoda. U Litvu mašyna trapiła z Francyi, była aficyjna zarehistravanaja.
Adjeździła pa litoŭskich darohach pryblizna hod», — raskazvaje Maryna Koktyš. Pa jaje słovach, prodaž mašyny aficyjna aformili ŭ Litvie, jak i dakumienty na vyvaz na litoŭskaj mytni. I ni ŭ kaho ź litoŭskich słužboŭcaŭ aŭto nie vyklikała pytańniaŭ. «Na litoŭskaj miažy mašynu afarmlali kala hadziny, praviarali pa ŭsich bazach», — kaža žurnalistka. Tamu zatrymańnie na biełaruskim baku dla jaje stała peŭnaj niečakanaściu: «Ja ŭžo ŭsim svaim smski paśpieła dasłać, što ŭsio dobra, miažu pierajechała».
Z mytni žurnalistka patelefanavała ŭ minski «Tajota‑Centr», dzie joj paćvierdzili, što numary kuzava i ruchavika jaje mašyny supadajuć ź ichniaj bazaj.
Maryna rehularna telefanuje litoŭskamu pradaŭcu.
«Jon taksama vielmi pieražyvaje. Pavodle damovy, pradaviec niasie ŭsiu adkaznaść za pradadzienaje aŭto. I jon mianie supakojvaje, što ŭsio budzie dobra, bo daskanała pravieryŭ mašynu pa ŭsich mahčymych bazach».
Žurnalistka kaža, što ciapier jaje «Tajota» staić na ašmianskaj mytni.
Pracedura ekśpiertyzy moža raściahnucca na miesiac, ale jana spadziajecca, što ŭsio zrobiać u samyja karotkija terminy, jak taho patrabuje mytny kodeks Biełarusi.
Nahadajem, što 17 lutaha 2010 h. u redakcyi haziety «Narodnaja vola» supracoŭniki Leninskaha RUUS stalicy praviali pieratrus. U vyniku byŭ kanfiskavany sistemny błok kampjutara, na jakim pracavała Maryna Koktyš.
