U adnych miascovaściach na mohiłkach źbirajucca ŭ Naŭski Čaćvier, u druhich — na Pravadnuju niadzielu, u bolšaści naviedvańnie kładoŭ adbyvajecca na 9-ty dzień paśla Vialikadnia. Sioleta Radaŭnicu buduć adznačać 13 krasavika.
Hety abrad paminańnia pamierłych siahaje dachryścijanskaje pary, jon dasiońnia — adzin z najžyviejšych. Štohod mohiłki na Radunicu naviedvajuć miljony ludziej.
Radaŭnica — spradviečnaje śviata, dzień spatkańnia rodu, ad 1991 hodu, ad času abviaščeńnia niezaležnaści Biełarusi, była abvieščanaja niepracoŭnym dniom.
Sam nazoŭ Radaŭnica (Radunica, Radanica) vielmi archaičny. Niama adzinaha mierkavańnia pra jaho pachodžańnie. Zdavałasia b, značeńnie słova lažyć na pavierchni. Tak, doŭhi čas jaho etymałohiju vyvodzili ad «radavacca» abo «rod». «Rod» — jasna, čamu. Na karyść «radasnaj» teoryi śviedčyła toje, što ŭ chryścijanski čas Radaŭnica stała «Vialikadniem pamierłych»: śviatam, prasiaknutym nadziejaj na ŭvaskrašeńnie i viečnaje žyćcio. Adnak mnohija navukoŭcy ličać takoje tłumačeńnie paviarchoŭnym. Bolš navukovym klučom da tłumačeńnia słova moža być litoŭskaje raudá «płač z hałašeńniem» i raudìnė «malitva z płačam i hałašeńniem». Paraŭnajcie, jak heta padobna da słavianskaha «rydańnia». Sam abrad paminańnia dziadoŭ pa Vialikadni ŭ nas ź litoŭcami identyčny.
Arhumient na karyść bałckaj teoryi — nazoŭ «Radaŭnica» nie pašyrany na poŭdzień ad Biełarusi. Prykładam, va Ŭkrainie.
Na mohiłkach prybirajucca zahadzia — na tak zvanuju Žyvuju Radaŭnicu — za niekalki dzion da vyznačanaha aŭtorka. Ličycca, što da Radaŭnicy nielha kapać ziamlu, bo na heta jašče niama zhody prodkaŭ.
Na Radaŭnicu mnohija biełarusy lubiać prynieści na mohiłki pačastunak, u tym liku śpirtnoje. Pravasłaŭnaja carkva nie ŭchvalaje hetaha, jak i pakidańnia na mohiłkach vielikodnych jajek, kažučy, što hałoŭnaje dla niabožčyka — malitva.
Sioleta na Radaŭnicu biełarusy buduć zhadvać nie tolki rodnych, ale i susiedziaŭ. Polšča straciła ŭ avijakatastrofie svajho prezidenta i elitu svajoj nacyi. 13 krasavika truna ź ciełam Lecha Kačynskaha budzie vystaŭlenaja dla raźvitańnia ŭ prezidenckim pałacy ŭ Varšavie.
