Biełaruś prapanuje Rasii admianić pošliny na naftapradukty ŭ 2010 hodzie, a na naftu — z 1 studzienia 2011 hoda. Pra heta zajaviŭ siońnia žurnalistam Alaksandr Łukašenka.
Havoračy ab vynikach niadaŭnich pierahavoraŭ u Maskvie, i ŭ pryvatnaści ab pošlinach na naftu i naftapradukty dla Biełarusi, adnym z asnoŭnych sprečnych pytańniaŭ u farmavańni Mytnaha sajuza, Alaksandr Łukašenka adznačyŭ, što «pytańnie nie ŭ nas». «Vy čuli maje pastajannyja patrabavańni i zajavy ab tym, što kali my stvarajem sajuz, u tym liku mytny, my abaviazkova pavinny stvaryć adnolkavyja ŭmovy dla ŭsich jaho ŭdzielnikaŭ. Heta asnoŭny pryncyp. Kali niama hetaj roŭnaści, to pra jaki sajuz možna vieści razmovu?» — adznačyŭ jon. Bolš za toje, Mytny sajuz składajecca z troch členaŭ, ale adnosiny Rasii pa adnym i tym ža pytańni da Biełarusi i Kazachstana časam adroźnivajucca. «Dapuścim, pa pošlinach na naftu.
Tam — biaspošlinnaja nafta, a tut uvodzicca pošlina»,
— pryvioŭ prykład kiraŭnik dziaržavy.
Pavodle jaho słoŭ, usie hetyja pytańni byli abmierkavany z kiraŭnictvam Rasii. U svaju čarhu prezident Rasii zapytaŭ, jakija Biełaruś moža ŭnieści prapanovy.
«Ja ŭnios hetyja prapanovy i mahu ich ciapier ahučyć», — skazaŭ Alaksandr Łukašenka.
Kiraŭnik biełaruskaj dziaržavy pierakanany, što dla taho, kab padyści da Mytnaha sajuza, viadoma, treba admianiać myty. «Ale ja skazaŭ, dobra, davajcie z 1 studzienia budučaha hoda admienim usie pošliny, a ciapier jak krok dobraj voli zdymajem mytnyja barjery, myty na naftapradukty. Na naftapradukty zdymajem ciapier, a my pacierpim užo da pačatku budučaha hoda nakont pošlin na naftu», — zajaviŭ Alaksandr Łukašenka.
«Ale z 1 studzienia budučaha hoda hetyja pošliny pavinny być źniaty», — padkreśliŭ jon. U takim vypadku, dadaŭ prezident, «my, nie čakajučy 1 studzienia, padpisvajem usie dakumienty, jakija pierš za ŭsio ŭ intaresach Rasii».
