Ja žurfakaŭ nie kančaŭ, adnak pradmietam žurnalistyki cikaŭlusia. Pahladzieŭšy, jak sprytna pradstaŭniki BT, ANT i STV brali interviju ŭ «niaźmiennaha», padumaŭ, što na žurfaku varta čytać kurs «Jak brać interviju ŭ prezydenta». Ja ŭjaviŭ manaloh vykładčyka:
«Dobry dzień, klasa, pačynajem lekcyju... Student Kazijatka, ujavi, što tvoj artykuł «Vialikaja Ajčynnaja pasiaŭnaja» ŭ naścienhazecie spadabaŭsia Jakuboviču, i ciabie ŭziali ŭ «Saŭbiełku». Raptam na Makajonka, 9 uźnik deficyt kadraŭ, i taboju vyrašyli zatknuć «analityčny adździeł». Ad tvajho materyjału «Ŭ Biełaruskim licei Monika Lavinski vykładaje etyku siamiejnych pavodzinaŭ» afihieŭ navat Zimoŭski. I ciapier ty — dyrektar adnaho z telekanałaŭ. I jak śled adnojčy... Kazijatka, słuchaj, a nie kałupajsia ŭ nosie, ciabie zaprašajuć na tet-a-tet ź Im u žyvym etery!
Takim čynam, što ty spytaješ pierš za ŭsie, kali aperatar skaža «Pracujem!»? Dzie Zavadzki, dzie Hančar? Aryhinalna, student, aryhinalna. Nu, a čamu b tabie nie skazać, što ŭ nas jość dasiahnieńni ŭ niejkaj halinie, heta vyznajuć krytyki prezydenta, i što jon sam dumaje na hety kont? Pasprabuj, Kazijatka... Našy dasiahnieńni ŭ vobłaści... nu... nu... Baraćby z rasiejskim pivam? Možna, tolki temu lepš abrać inšuju, skažam, ekanomika.
Idziom dalej. Jon lubić zrabić histaryčny ekskurs ŭ pačatak 1990-ch, kali ŭsie čakali jaho, jak mesiju. Dyk padviadzi jaho da hetaj temy adpaviednym pytańniem. Nie, Kazijatka, tvajo «Ci praŭda, što heta vy pieršym unieśli ŭ zalu Viarchoŭnaha savietu był-čyrvona-bieły štandar?» absalutna nie pasuje.
Što jašče? Časam jon dapuskaje familjarnaści. Moža ŭziać i nazvać ciabie Vasiem. Nu ty, Vasia, nie ŭsprymaj heta jak niejki syhnał da pierachodu da niefarmalnaj abstanoŭki. Kryj boža zapalić cyharku ŭ žyvym etery...
Časta ź jaho vusnaŭ źlatajuć emacyjnyja vyrazy, jakija nia treba razumieć dasłoŭna. Tak, niejak jon dazvoliŭ sabie pasaž: «Luby ruch cieła ŭ nakirunku destabilizacyi abstanoŭki — źvierniem hałovy tym, chto heta robić, i tym, chto budzie ich finansavać». Na Zachadzie žurnalisty abaviazkova pačali b udakładniać techničnyja detali adkručvańnia bošak Bušu i Kandalizie Rajs? A ty, Kazijatka, maŭčy.
Nu, i apošniaje: nie dapuskajcie litaraturnych volnaściaŭ z nazvami materyjału. Kali jon kaža, što jon «bity voŭk», nie abaviazkova zdavać tekst u druk pad šapkaj «Bity voŭk choča pakusać babku Eŭropu». Lepš niešta kštałtu «Dziaržava — heta narod», abo «Žyć stała jašče stabilniej, žyć stała jašče viesialej!» Zrazumieli, nievuki? Lekcyja zakončanaja».
