Heta inicyjatyva biełaruskaha boku, Eštan hatovaja jaho pryniać.
Ministr zamiežnych spraŭ Biełarusi Siarhiej Martynaŭ prybudzie na nastupnym tydni ŭ Brusel, dzie jon choča sustrecca z kiraŭnikom dypłamatyi ES Eštan — pra heta daviedałasia ŭ piatnicu z dypłamatyčnych krynicaŭ u Bruseli ahienctva PAP.
«Martynaŭ, napeŭna, pryjedzie ŭ Brusel», — zajaviła ahienctvu krynica ŭ Jeŭrakamisii. Sa słovaŭ dypłamataŭ, vizit adbyvajecca ź inicyjatyvy biełaruskaha boku. Martynava maje pryniać kiraŭnica dypłamatyi ES Ketryn Eštan i, mahčyma, taksama kamisar ES pa pytańniach pašyreńnia i palityki susiedstva Štefan Fiule.
Fiule, kažuć, užo mieŭ z Martynavym telefonnuju razmovu na hetym tydni.
Minsk jaŭna zaniepakojeny namieram ES adnavić vizavyja sankcyi suprać režymu ŭ Minsku, a taksama, mahčyma, uvieści sankcyi ekanamičnyja. Takuju reakcyju vyklikali vybary 19 śniežnia i taja fantasmahoryja, što adbyłasia paśla ich.
Była zrežysiravana hrubaja pravakacyja. Kandydataŭ ad apazicyi źbili i aryštavali, da 700 čałaviek było zatrymana. Dziasiatki prychilnikaŭ apazicyi byli zvolnieny z pracy. Usio heta supravadžałasia brudnaj prapahandysckaj kampanijaj u hiobielsaŭskim duchu ŭ dziaržaŭnych ŚMI.
Usio heta vyklikała burnuju reakcyju hramadzianskaj supolnaści Jeŭropy, jakaja patrabuje ad uradaŭ nieadkładnych zachadaŭ pa abaronie pravoŭ čałavieka ŭ krainie, što miažuje z tryma dziaržavami ES.
