Amierykanskija pravaŭładalniki zacikavilisia faktam parušeńnia aŭtarskich pravoŭ stvaralnikami filma «Płošča. Žalezam pa škle».
Praktyčna na praciahu ŭsiaho filma, jaki ŭpieršyniu vyjšaŭ u efir 9 studzienia, hučyć muzyčnaja padkładka, zaklikanaja padkreślivać słova za kadram i vizualny šerah.
— U mianie jość chobi składać muzyku, tamu vucha pastajanna čaplajecca za niejkija miełodyi, — raskazaŭ «Salidarnaści» karespandent Ruskaj słužby navin u Biełarusi, błohier Uładzimir Čudziancoŭ. — Z dapamohaj siabroŭ atrymałasia identyfikavać muzyku, što nastojliva hučała ledź nie ŭ pałovie filma «Płošča. Žalezam pa škle».
Vyjaviłasia, što heta saŭndtrek znakamitaha amierykanskaha kampazitara Džejmsa Chorniera da filma «Kamanda», źniataha kinastudyjaj «20th Century Fox» z Arnoldam Švarcenehieram u hałoŭnaj roli.
Kampazitar Džejms Chornier viadomy tym, što napisaŭ muzyku da vialikaj kolkaści filmaŭ, siarod jakich takija znakamityja stužki, jak «Tytanik» i «Avatar».
Akramia taho, ahulnymi namahańniami błohieraŭ atrymałasia identyfikavać i inšyja treki, jakija prahučali ŭ filmie. Siarod ich — muzyčnaje supravadžeńnie da takich viadomych karcin, jak «Ad zachodu da śvitańnia», «Rekvijem pa mary» i navat saŭndtrek kamputarnaj hulni «Maks Pajn».
Jak zmahli pierakanacca šmatlikija hledačy, u jakich chapiła siłaŭ dahledzieć BTšnuju ahitku da kanca, ni ŭ tytrach, ni
dzie-niebudź u filmie spasyłki na pravaŭładalnika, hetak ža jak i na miełodyi, zroblena nie było.
— Heta niadziŭna, bo pa zakonie ab aŭtarskich pravach za lubuju miełodyju treba płacić pravaŭładalniku, — adznačyŭ Uładzimir Čudziancoŭ. — Navat rynhtony prynosiać prybytak aŭtaram aryhinalnych kampazicyj.
Praź siabroŭ žurnalist źviarnuŭsia da jurystaŭ i ahientaŭ Džejmsa Chorniera, kinakampanii «20th Century Fox» i studyi «Lions Gate», jakoj naležać pravy na film «Rekvijem pa mary».
— Na 14 studzienia viadoma, što advakaty pravaŭładalnika zacikavilisia faktam parušeńnia aŭtarskaha prava i niezakonnaha vykarystańnia i redahavańnia muzyki, — adznačyŭ Uładzimir Čudziancoŭ. — Ciapier rychtujucca dakumienty. Mahčyma, amierykanskija advakaty nie vystaviać naŭprostyja pozvy Pieršamu nacyjanalnamu kanału, daručyŭšy razhlad firmam, jakija akazvajuć jurydyčnyja pasłuhi. Mahčyma navat biełaruskim.
Što takija parušeńni aŭtarskich pravoŭ mohuć paciahnuć dla Pieršaha Nacyjanalnaha kanała?
Kažučy jurydyčnaj movaj, było dapuščana niesankcyjanavanaje redahavańnie abjekta aŭtarskaha prava, jaho kamiercyjnaje vykarystańnie i pieradača ŭ efir.
«Salidarnaść» źviarnułasia pa kansultacyju da kiraŭnika jurydyčnaj słužby Biełaruskaha Chielsinskaha kamiteta Hary Pahaniajły.
— U cyvilizavanych krainach pozvy i razhlady pa pytańniach parušeńnia aŭtarskich pravoŭ — narmalnaja praktyka. U Biełarusi, na žal, nie. Choć, biezumoŭna, takija pozvy mahčymyja. Našy čynoŭniki, asabliva sa śfiery ideałohii, parušajuć usie mažlivyja zakony prava i marali. Ź imi ciažka sudzicca, tamu što našy sudy buduć na baku hetych čynoŭnikaŭ, — adznačyŭ Hary Pahaniajła. — Što da zvarotaŭ mižnarodnych sudovych instancyj, to tut ja baču mahčymaść adstojvańnia aŭtarskich pravoŭ i kampiensacyi materyjalnaj i maralnaj škody. Akramia taho,
nie varta zabyvać pra isnyja pahadnieńni, u adpaviednaści ź jakimi ŭ dačynieńni da arhanizacyjaŭ, jakija parušyli aŭtarskija pravy, možna ŭžyć raznastajnyja sankcyi.U vyniku ich reputacyja budzie padmočanaja, i jany paniasuć finansavyja i imidžavyja straty.
