Alesia Atroščankava pačali znajomić z materyjałami spravy ab udziele ŭ masavych biesparadkach 19 śniežnia. Nastu Pałažanku pakinuli ŭ turmie KDB. Alaksandra Fiadutu znoŭ dapytali.
Z Alesiem Atroščankavym, byłym presavym sakratarom Andreja Sańnikava, sustreŭsia ŭ «amerykancy» advakat Vadzim Mušynski. Pavodle advakata, Alesia pačali znajomić ź jahonaj kryminalnaj spravaj. Žonka viaźnia Darja Atroščankava nie vyklučaje, što ciaham miesiaca spravu muža mohuć pieradać u sud:
«Jamu inkryminujuć 293 artykuł, častka 2 — heta ŭdzieł u masavych nieparadkach. Vinavatym siabie jon nie pryznaje, nijakich listoŭ da Łukašenki z pryznańniami nie pisaŭ».
Pavodle artykuła, jaki vystaŭleny aktyvistu, jamu pahražaje ad 3 da 8 hadoŭ niavoli. Dniami arhanizacyja «Mižnarodnaja amnistyja» pryznała siabra BAŽu Alesia Atroščankava viaźniem sumleńnia.
2 lutaha Centralny rajonny sud Miensku nie zadavoliŭ chadajnictva advakata Kaciaryny Piatrovič adnosna źmieny miery strymańnia dla Nasty Pałažanki. Aktyvistka «Maładoha frontu» zastajecca adzinaj žančynaj siarod fihurantaŭ spravy ab masavych nieparadkach, jakuju trymajuć pad vartaj u turmie KDB.
Pavodle baćki aktyvistki Ŭładzimiera Pałažanki, siońnia, 3 lutaha, mahčyma, adbuducca śledčyja dziejańni z udziełam Nasty i advakat zmoža jaje pabačyć.
Dniom raniej adbyŭsia čarhovy dopyt Alaksandra Fiaduty, viadomaha palitolaha i davieranaj asoby Ŭładzimiera Niaklajeva. Žonka Fiaduty Maryna paviedamiła sa spasyłkaj na advakata:
«Ničoha novaha niama. Vyhladaje schudniełym, sumnym. Šukajuć, čym by jaho pakarać — usio zrazumieła».
Pavodle źviestak, na minułym tydni, 28 studzienia, u Alaksandra Fiaduty i Ŭładzimiera Niaklajeva była vočnaja staŭka.
Pra zdaroŭje Ŭładzimiera Niaklajeva, jaki z 29 studzienia znachodzicca pad chatnim aryštam, viadoma, što jon prymaje leki, źniešnie pačuvajecca narmalna. Dakładna skazać pra stan zdaroŭja Niaklajeva jahonaja žonka Volha nia moža, bo da muža nie puskajuć daktaroŭ:
«Chto ž skaža dakładna, kali da jaho nikoha nie puskajuć? Uvohule nikoha ŭ dom nie puskajuć. Budziem pisać zajavu na toje, kab puścili dla ahladu svajho, viedamasnaha doktara, kali nielha zvyčajnaha».
Žonka
«Ad Alesia listoŭ niama, advakat Aleh Ahiejeŭ sprabavaŭ učora da jaho pajści na razmovu, ale marna. Uvieś dzień prabyŭ u čarzie, stajaŭ pieršym, ale nie puścili».
Z 29 śniežnia nie sustrakaŭsia z advakatam Mikałaj Statkievič. «Planuju pajści da jaho zaŭtra, 3 lutaha», — paviedamiła advakatka Taciana Stankievič.
U spravie 19 śniežnia, pavodle pravaabaroncy Nasty Łojki, užo fihuruje 53 čałavieki.
Siońnia ž stała viadoma, što adnaho ź fihurantaŭ spravy, Mikitu Lichavida, z Žodzinskaha izalatara pieraviali ŭ izalatar na Vaładarskaha. Pra heta paviedamiła maci viaźnia Alena Lichavid:
«Jon užo na Vaładarskaha. Napisaŭ, što pierajezd byŭ vielmi ciažki, što vielmi choładna ŭ kamery. Tamu my siońnia jamu pieradali ciopłyja rečy. I, peŭna, zaŭtra ci ŭ piatnicu da jaho pojdzie advakat».
