Hieneralny sakratar Rady Eŭropy Turbjorn Jahłand hłyboka rasčaravany i zaniepakojeny paćviardžeńniem jašče adnaho śmiarotnaha prysudu ŭ Biełarusi. Prysud byŭ vyniesieny Viarchoŭnym sudom krainy.
Pra heta havorycca ŭ zajavie hieneralnaha sakratara, jakaja raźmieščana na sajcie Rady Eŭropy.
«U Biełarusi adznačajecca rost kolkaści dyskusij pra admienu śmiarotnaha pakarańnia, ale hetaha niedastatkova, kab prakłaści šlach da maratoryju. Siońnia dla pierachodu ad słoŭ da dziejańniaŭ nieabchodnaja sapraŭdnaja palityčnaja vola. Śmiarotnamu pakarańniu nia miesca ŭ systemach kryminalnaha pakarańnia sučasnych hramadztvaŭ», — dadaŭ Jahłand.
Biełaruski parlament byŭ pazbaŭleny statusu «specyjalna zaprošanaha» ŭ Parlamenckaj asamblei Rady Eŭropy. Pavodle apošnich rašeńniaŭ, viarnuć hety status Biełaruś moža tolki ŭ tym vypadku, kali ŭviadzie maratoryj na śmiarotnaje pakarańnie.
Adnak Biełaruś znoŭ pryviała ŭ vykanańnie niekalki śmiarotnych prysudaŭ. U adkaz Asambleja vyrašyła «zamarozić» usie kantakty z krainaj. Mieć znosiny z aficyjnym Mienskam ad PARE moža tolki admysłovaja dakładčyca Sinika Churskajnen.
Raniej Jahłand užo zajaŭlaŭ, što ŭviadzieńnie maratoryju na vykanańnie śmiarotnych prysudaŭ u Biełarusi — adna z asnoŭnych umoŭ dla viartańnia krainie statusu «specyjalna zaprošanaj» u PARE.
