Michaś Łužynski (źleva) na biełaruskich mohiłkach u Sidniei.
U špitali ŭ Sankt-Pieciarburhu pamior dziejač biełaruskaj dyjaspary ŭ Aŭstralii Michaś Łužynski. U Sankt-Pieciarburhu jon znachodziŭsia z turystyčnaj hrupaj. Vierahodna, źbiraŭsia naviedać Biełaruś.Pra heta paviedamiła siabra Vialikaj Rady MHA «ZBS «Baćkaŭščyna», staršynia Biełaruska-Amierykanskaha Zadzinočańnia Hanna Surmač.
Michaś Łužynski naradziŭsia ŭ 1926 hodzie ŭ vioscy Kabyłki Pałačanskaj vołaści Maładziečanskaha pavietu Vilenskaha vajavodstva (ciapier Maładziečanski r-n Minskaj vobł.). Baćka pracavaŭ sakratarom vołaści. U 1935 hodzie siamja pierajechała ŭ Haradok, potym ŭ 1939 hodzie ŭ Pałačany. U 1941 hodzie Michaś Łužynski skončyŭ siamihodku ŭ Chažovie. A ŭ 1942 hodzie pajšoŭ u handlovuju škołu ŭ Maładziečnie, dyrektaram jakoj byŭ Barys Kit. Pravučyŭsia tam dva hady. Byŭ siabram SBM.
Paśla zakryćcia handlovaj škoły zapisaŭsia dobraachvotnikam u škołu Luftvafe i razam ź inšymi 46 chłopcami byŭ vyviezieny ŭ Polšču, a potym — u Niamieččynu. U 1945 hodzie apynuŭsia ŭ biełaruskim łahiery Vatenštat (Niamieččyna), dzie ŭ 1946-m paznajomiŭsia z budučaj žonkaj Nadziejaj. Ažaniŭsia ŭ kancy 1948-ha, a ŭ kancy 1949-ha vyjechaŭ z žonkaj ŭ Aŭstraliju.
Siamja pasialiłasia ŭ Sidniei. Spačatku Michaś pracavaŭ elektramancioram. Potym, skončyŭšy inžynernyja kursy, pajšoŭ pa słužbovaj leśvicy ŭharu, byŭ inśpiektaram pry pabudovie elektryčnych linijaŭ. U 1979-m pačaŭ nievialiki biznes — zajmaŭsia pakupkaj i prodažam draŭniny.
Ad samaha pačatku aktyŭna ŭdzielničaŭ u biełaruskim hramadskim žyćci Aŭstralii, byŭ siabram Biełaruskaha Abjadnańnia ŭ Aŭstralii, uznačalvaŭ Biełaruskaje Abjednańnie ŭ Novaj Paŭdniovaj Valii (1951—1953 hh.), redahavaŭ časopis «Novaje žyćcio», byŭ staršynioj Biełaruskaha hramadska-kulturnaha kłubu.
Na praciahu 17 hadoŭ jaho hołas hučaŭ na aŭstralijskich radyjochvalach, z 1976 da 1993 hoda (ad 1983 hoda rabiŭ pieradačy adnaasobna).
Uspaminy Michasia Łužynskaha čytajcie tut.abo tut
