Rasija i Biełaruś padpisali kantraktnaje pahadnieńnie pa AES 5

Rasijskaje ZAT «Atambudekspart» i biełaruskaja dziaržaŭnaja ŭstanova «Dyrekcyja budaŭnictva atamnaj elektrastancyi» 11 vieraśnia ŭ Kranštacie (Rasija) padpisali kantraktnaje pahadnieńnie pa ŭźviadzieńni pieršaj čarhi AES na terytoryi Biełarusi.

Pahadnieńnie vyznačaje asnoŭnyja pałažeńni hienieralnaha kantrakta na budaŭnictva pad kluč dvuch enierhabłokaŭ AES ahulnaj mahutnaściu da 2.400 MVt z reaktarnaj ustanoŭki V-491. Praduhledžana, što biełaruskaja AES budzie ŭzvodzicca na ŭmovach poŭnaj adkaznaści hienieralnaha padradčyka.

Dla budaŭnictva pieršaj biełaruskaj AES vybrany prajekt «AES-2006» AAT «Sankt-Pieciarburhski Atamenierhaprajekt». Dla raźmiaščeńnia atamnaj stancyi vybrana Astravieckaja placoŭka ŭ Hrodzienskaj vobłaści.

Pieršy błok biełaruskaj AES płanujecca ŭvieści ŭ stroj u 2017 hodzie, druhi błok — u 2018 hodzie.

Jak rastłumačyła RIA Novosti krynica ŭ kampanii «Atambudekspart», kantraktnaje pahadnieńnie — heta ramačny dakumient, jaki vyznačaje strukturu, «kaściak» nastupnych dahavoraŭ i kantraktaŭ. Što da pieramoŭ ab vydzialeńni Rasijaj dziaržkredytu na budaŭnictva AES, to jany praciahvajucca, dapoŭniŭ pradstaŭnik kampanii.

Raniej u Minsku zajaŭlali, što Biełaruś raźličvaje atrymać ad Rasii pad budaŭnictva AES kredyt u pamiery nie mienš jak 7 młrd. dołaraŭ.

3 kastryčnika na pres-kanfierencyi ŭ Minsku namieśnik ministra enierhietyki Biełarusi Michaił Michadziuk adznačyŭ: «Što da finansavańnia prajekta, to ŭ vysokaj stupieni hatoŭnaści kredytnaje pahadnieńnie ab vydzialeńni dziaržaŭnaha ekspartnaha kredytu dla budaŭnictva atamnaj elektrastancyi. Paśla zaviaršeńnia ŭnutrydziaržaŭnych pracedur, jak u RF, tak i ŭ RB, my ŭpeŭnieny, jano budzie padpisana».

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH